Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 216 Hüküm no: 282 Orijinal metin no: [26b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dellak İsmail b. Ömer’in yüz otuz guruş alacağını ödemesi için Hamamcı Mehmed Beşe’ye üç ay süre verdiği Galata’da Karaköy Hamamı dellâklarından İsmail b. Ömer nâm kimesne Galata Bâb Mahkemesi’nde meclis-i şer‘de hamam-ı mezkûrenin hamamcısı Mehmed Beşe b. Hüseyin nâm kimesne muvâcehesinde mezbûr Mehmed Beşe zimmetinde cihet-i karzdan elli guruş ve hamam-ı mezkûrede dellâklık işlemek için mukaddemâ bi-tarîkı’r-rüşve yedimden ve mâlımdan bi-gayr-ı hak ahz u kabz eylediği seksen guruş ki cem‘an yüz otuz guruşu mezbûr Mehmed Beşe’den hâlâ taleb ederim deyü da‘vâ eyledikde ol dahi ber-vech-i muharrer ikrâr lâkin mezbûr Mehmed Beşe meblağ-ı mecmû‘-ı mezkûr yüz otuz guruşu hâlâ ve def‘aten edâya iktidârı olmayıp ber-vech-i âtî te’cîl ve taksîta tâlib olmağla mezbûr İsmail dahi mezbûr Mehmed Beşe’yi bi’t-terâzî işbu târih-i i‘lâmdan beher şehr on guruşdan üç ay tamamına değin te’cîl ve taksît eylediğinde ol dahi ecel-i mezkûru kabûl ve müddet-i mezkûre tamamına dek edâya ta‘ahhüd edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 3 C sene [1]221.