Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 266 Hüküm no: 381 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Kapudan’ın Sakız kuşağı bedelinden Topçu Mustafa Beşe’den kırk iki guruş alacağı olduğu Sefâyin-i sultânîye kapudanlarından Kasım Kapudan b. Osman nâm kimesne Galata Bâb Mahkemesi’nde meclis-i şer‘de Topçu Mustafa Beşe b. İbrahim nâm kimesne muvâcehesinde mezbûr Mustafa Beşe zimmetinde bundan akdem yedimden ve mâlımdan iştirâ ve kabz eylediği beher adedi sekizer buçuk guruşa olmak üzere dokuz aded Sakız kuşağı semenlerinden cem‘ an yetmiş yedi guruşdan bâkī kırk iki guruş alacak hakkım olmağla hâlâ taleb ederim deyü ba‘de’d-da‘vâ ve inkâr müdde‘î-i mezbûr ber-vech-i muharrer müdde‘âsını lede’t-tezkiye makbûlü’ş-şehâde idükleri ihbâr olunan Hasan Beşe b. Ömer ve İbrahim Beşe b. Veliyüddin nâm kimesneler şehâdetleriyle mezbûr Mustafa Beşe muvâcehesinde vech-i şer‘î üzere isbât etmeğin mûcebince meblağ-ı bâkī-i mezkûr kırk iki guruşu müdde‘î-i mezbûr Kasım Kapudan’a edâ ve teslîme mezbûr Mustafa Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 25 Receb sene 1221.