Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 308 Hüküm no: 471 Orijinal metin no: [45a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Hasan Beşe’nin evinden altınlarının çalınmasına delalet ettikleri iddiasıyla komşusu Hüseyin Beşe ve karısı Ayşe aleyhine açtığı davanın meşru olmadığı Galata’da el-Hâc A‘mâ Mahallesi’nde sâkin Manav Hasan Beşe b. Süleyman nâm kimesne Galata Bâb Mahkemesi’nde meclis-i şer‘de câr-ı mülâsıkı Hüseyin Beşe b. Halil ile zevcesi zâtı mu‘arrefe Âişe bt. Abdullah nâm hatun muvâcehelerinde zevcân-ı mezbûrânın mahalle-i mezbûrede vâki‘ menzillerinde sâkine gāibe ani’l-meclis diğer Âişe Hatun menzilime gelip menzil-i mezkûrda sepet? sandık derûnunda mevcûde mâlımdan mecmû‘u elli iki [guruş] kıymetli üç aded yaldız ve bir İstanbul zer-i mahbûbu ve bir fındık altınları ve on bir guruşumu bi-gayr-ı hak ahz edip lâkin gāib-i mezbûre diğer Âişe’nin menzilime gelmesine zevcân-ı mezbûrânın emirleriyle olduğu mesmû‘um olmağla meblağ-ı mezkûru zevcân-ı mezbûrândan tazmîn taleb ederim deyü tasaddî eylediği da‘vâsı takrîr-i meşrûhu üzere meşrû‘a olmayıp zevcân-ı mezbûrâna bî-vech mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 12 L sene 1221.