Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 313 Hüküm no: 481 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hadice Hatun’un kızının başka birisiyle evlenmesi üzerine yanına aldığı torunu Hüseyin için fakir olan eski damadı Seyid Hasan Beşe’den nafaka talep etmemeye söz verdiği Derûn-ı arzuhâlde mezkûretü’l-ism mu‘arrefetü’z-zât Şerife Hadice bt. es-Seyyid Abdullah nâm hatun Galata Bâb Mahkemesi’nde meclis-i şer‘de sâbıkā damadı sâhib-i arzuhâl es-Seyyid Hasan Beşe b. Halil Çavuş muvâcehesinde mezbûr es-Seyyid Hasan Beşe ile kızım işbu hâzıra bi’l-meclis Şerife Hanife bt. İbrahim nâm hatunun zevciyyet beynlerinde kāime iken mezbûr es-Seyyid Hasan Beşe’nin firâşından hâsıl ve kızım hâzıra-i mezbûreden mütevellid bi-hakkın sagīr oğlu es-Seyyid Hüseyin kızım hâzıra-i mezbûrenin bi-hakkı’l-hıdâne hacr ve terbiyesinde iken üç sene mukaddem kızım hâzıra-i mezbûre nefsini sagīr-i mezbûra ecnebî kimesneye tezvîc etmekle ol vechile sagīr-i mezbûrun hıdânesi kızım hâzıra-i mezbûreden sâkıt ve bana râci‘ olmağla hâlâ sagīr-i mezbûr bi-hakkı’l-hıdâne hacr ve terbiyemde olup lâkin sagīr-i mezbûrun babası mezbûr es-Seyyid Hasan Beşe fakīr olup sagīr-i mezbûr için nafaka vermeğe kudreti olmamağla ben mu‘sire olup sagīr-i mezbûru bilâ-ecr ve bilâ-nafaka kendi mâlımdan imsâk edip babası mezbûr es-Seyyid Hasan Beşe’den nafaka ve nafaka cinsinden nesne mütâlebe etmemek üzere ta‘ahhüd-i tâm eyledim deyü ikrâr ve tasdîkleri huzûr-ı âlîlerine i‘lâm olundu. Fî 18 L sene 1221.