Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 339 Hüküm no: 525 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Ali’nin Emine bt. Hacı Hasan’dan aldığı borç karşılığında rehin verdiği altın bileziğinin borcunu ödemesi üzerine kendisine iadesi gerektiği Derûn-ı arzuhâlde mezkûretü’l-ism Emine Hatun bt. el-Hâc Hasan Galata’da mahfil-i kazâda sâhibe-i arzuhâl Hadice bt. Ali tarafından husûs-ı âtîde vekîl olduğu zâtını ârifân es-Seyyid Osman b. es-Seyyid Ebîbekir ve Bostanî Halil Beşe b. Hüseyin şehâdetleriyle zâhir olan Haseki el-Hâc Mehmed b. Mustafa muvâcehesinde müvekkile-i mezbûre Hadice Hatun bundan akdem yedimden ve mâlımdan iktirâz ve kabz eylediği yüz altmış guruş deyni mukābelesinde mâlından başları elmas taşlı bir tek altın bileziği rehin vaz‘ ve yedine teslîm etmekle meblağ-ı merkūm yüz altmış guruş bana edâ-birle fekk-i rehine müvekkile-i mezbûreye izâfetle vekîl-i mezbûra tenbîh olunmak matlûbumdur deyü tasaddî eylediğim da‘vâmdan bâ-vesâtet-i muslihîn yüz yirmi guruşa müvekkile-i mezbûreye izâfetle vekîl-i mezbûr Haseki el-Hâc Mehmed Ağa ile sulh olduğumda ol dahi ber-vech-i muharrer sulh-ı mezkûru ba‘de’l-kabûl bedel-i sulh-ı mezkûrdan mâ‘adâ kırk guruşa ve bi’l-cümle husûs-ı mezkûra müte‘allika âmme-i de‘âvîden herbirimiz âharın zimmetini kabûlü hâvî bi’l-asâle ve bi’l-vekâle ba‘de’l-ibrâ bedel-i sulh-ı merkūm yüz yirmi guruşu bana edâ-birle fekk-i rehine tenbîh olunmak matlûbumdur deyü ba‘de’d-da‘vâ ve’l-ikrâr mûcebince bedel-i sulh-ı merkūm yüz yirmi guruşu müdde‘iye-i mezbûre Emine Hatun’a edâ-birle fekk-i rehine müvekkile-i mezbûreye izâfetle vekîl-i merkūm el-Hâc Mehmed Ağa’ya tenbîh olunduğu bi’[l]-iltimâs huzûr-ı âlîlerine i‘lâm olundu. Fî 15 Ra sene 1221.