Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 383 Hüküm no: 618 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Sinan’ın tasarrufunda olan yarım vakıf menzil hissesine müdahalede bulundukları iddiasıyla Kürkçü Karabet v. Mardros ve karısı Pohi aleyhine açtığı davada haksız olduğunun anlaşıldığı Mübârek rikāb-ı kamer-tâb-ı hüsrevânîye arzuhâl eden mu‘arrefetü’ş-şahs Maryem bt. Sinan nâm Nasrâniye bi’t-terâzî mahrûse-i Galata’da meclis-i şer‘-i münîrde diğer arzuhâl sâhibleri olup işbu arzuhâl derûnunda isimleri mesfûr Kürkçü Karabet v. Mardros ve zevcesi şahs-ı mu‘arrefesi Pohi bt. Manuk nâm zevcân muvâcehelerinde işbu arzuhâl ve diğer arzuhâl hâmişlerinden mastûr der-kenârlar nâtık olduğu üzere mahrûse-i mezbûre kādıları nezâretlerinde olan evkāfdan merhûm Ahmed Ağa Vakfı müstegallâtından mahrûse-i mezbûre hâricinde Santa Marka Mahallesi’nde vâki‘ etrâf-ı erba‘adan Papuşçu Çalıkoğlu ve Acem Adranos menzilleri ve arsa ve tarîk-i âm ile mahdûd müştemilât-ı ma‘lûmeyi hâvî bir bâb vakıf menzilin nısf hissesi icâreteyn ile benim mukaddemâ tasarrufumda iken ben nısf hisse-i mezkûremi izn-i mütevellîyle li-ebeveyn er karındaşım gāib ani’l-meclis İstefan zimmîye ferağ ve teslîm ve karındaşım mesfûr dahi izn-i mütevellîyle zevcân-ı mersûmâna bi’l-munâsafe ferağ ve teslîm eyledikde zevcân-ı mersûmân dahi tefevvüz ve tesellüm ve kabûl eylediklerinden sonra ferağ-ı evvel-i merkūm şürût-ı müfside ile olmuş idi deyü karındaşım gāib-i mersûm ve mütevellî-i vakf hâzırlar olduğu hâlde zevcân-ı mersûmândan bundan akdem da‘vâ eylediğimde onlar dahi menzil-i merkūma vaz‘-ı yedlerini ikrâr, şart-ı müfsid da‘vâmı inkâr etmeleriyle ben müdde‘âma ikāmet-i beyyine edip nısf hisse-i mezkûreyi hükm-i hâkimü’ş-şer‘le geri tefevvüz ve mütevellîsi tasarruf etmeğin nısf menzil-i merkūmu tasarrufumu nâtık sene-i mâziye Şevvâli’nin yirmi beşinci günü tarihiyle müverrah kıbel-i şer‘den yedime i‘lâm-ı şer‘î i‘tâ olunmuş iken zevcân-ı mersûmân nısf menzil-i merkūmu bana teslîmden imtinâ‘ ve tasarrufuma müdâhale etmeleriyle suâl olunup nısf menzil-i mezkûru bana teslîm-birle tasarrufuma mümâna‘atları def‘ olunmak murâdımdır deyü vakf-ı merkūma li-ecli’l-maslaha kāimmakām-ı mütevellî nasb olunan Halil Ağa hâzır olduğu hâlde ba‘de’d-da‘vâ ve’s-suâl zevcân-ı mersûmân dahi cevâblarında hâl bi’l-cümle bâlâda bast olunan minvâl üzere olduğunu ve mazmûn-ı i‘lâm-ı mezkûru herbiri ikrâr-ı şart-ı müfside müdde‘âsını inkârlarında ısrârlarından gayrı müdde‘iye-i mersûme Maryem Nasrâniye ber-vech-i meşrûh şart-ı müfsid da‘vâsında mübtile ve kâzibe olup hattâ vech-i muharrer üzere da‘vâsında kâzibe ve mübtile olduğunu ve menzil-i merkūmda aslâ ve kat‘â alâka ve medhali olmadığını işbu i‘lâm tarihinden iki ay mukaddem mahrûse-i mezbûre hâricinde Aci Serkiz odalarında mütemekkine olduğu menzili derûnundan mahzar-ı şuhûdda ikrâr u i‘tirâf ve işhâd dahi etmekle nısf menzil-i merkūmu kemâ-fi’s-sâbık tefevvüz murâdımızdır deyü herbiri ba‘de’d-da‘vâ ve’l-inkâr zevcân-ı mersûmân ber-vech-i muharrer müdde‘âlarını mahallerinde lede’t-tezkiye makbûlü’ş-şehâde idükleri ihbâr olunan Üstüyan v. Abraham ve Kalyos v. Temrit ve Oseb v. Kerope nâm zimmîler şehâdetleriyle mersûme Maryem Nasrâniye muvâcehesinde vech-i şer‘î üzere isbât etmeğin zevcân-ı mersûmân yedlerinde olup meclis-i şer‘de ibrâz eyledikleri fetvâ-yı şerîfede; “Hind icâreteyn ile tasarrufunda olan vakıf menzili izn-i mütevellîyle Zeyd’e ferağ ettikden sonra Hind Zeyd’den ferağ-ı mezkûr şart-ı müfsid ile olmuş idi deyü da‘vâ ve Zeyd inkâr etmekle Hind müdde‘âsına ikāmet-i beyyine edip murâfa‘a oldukları kādı menzili Hind’e hükmettikden sonra Zeyd Hind’den da‘vâ-yı mezkûresinde mübtile olup hattâ vech-i muharrer üzere ikrâr dahi etmişidin deyü da‘vâ ettikde ikrâr-ı meşrûhuna ikāmet-i beyyine edicek menzili re’y-i mütevellîyle Hind’den almağa kādir olur mu deyü suâlin cevâb-ı bâ-savâbında; olur” buyrulmağın ber-mûceb-i fetvâ-yı şerîfe nısf menzil-i mezkûrdan kasr-ı yedine mersûme Maryem Nasrâniye’ye ba‘de’t-tenbîh re’y-i mütevellîyle zevcân-ı mersûmânın geri tefevvüz ve tasarrufları iktizâ eylediği mübâşirleri Erzurumî Abdullah ve Hocapaşalı Ali Çavuş kulları yediyle huzûr-ı âlîlerine i‘lâm olundu. Fî 29 M sene 1222.