Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 385 Hüküm no: 620 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin vermeyi vadettiği “mellâh payı”nı kendisine vermediği iddiasıyla Ahmed Reis aleyhine açtığı alacak davasının meşru olmadığı Sefîne sandalcılarından Mehmed Beşe b. Hasan nâm kimesne Galata Bâb Mahkemesi’nde meclis-i şer‘de sefîne reislerinden Ahmed Reis b. Mehmed nâm kimesne muvâcehesinde ben reis-i mezbûrun sandalında sandalcılık hizmeti için beher şehr otuz guruş ücret tesmiyesiyle dokuz ay hizmet edip müddet-i mezkûrede eylediğim hizmetimin ecr-i müsemmâsı olan cem‘an doksan guruşu bana teberru‘an mâlından hibe ve temlîk ve teslîm eylediği kırk guruş ki min-haysü’l-mecmû‘ yüz otuz guruşu reis-i mezbûr yedinden tamamen ahz u kabz eyledim lâkin reis-i mezbûr mellâh payı olmak üzere sana elli guruş veririm deyü va‘ad etmekle va‘ad-i mezkûruna binâen meblağ-ı merkūm elli guruşu mücerred reis-i mezbûrdan taleb ederim deyü tasaddî eylediği da‘vâsı takrîr-i meşrûhu üzere meşrû‘a ve iltifâta şâyân olmayıp reis-i mezbûra bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 26 M sene 1222.