Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 385 Hüküm no: 621 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı Hasan Beşe’nin başı eşyalarını karısı Ayşe bt. Halil’e sattığı Mahrûse-i Galata’ya muzâfe kasaba-i Fındıklı’da Kazgancıbaşı Mahallesi’nde Kayıkçı Hasan Beşe b. Ahmed nâm kimesne meclis-i şer‘-i şerîf-i enverde hâlâ zevcesi râfi‘atü hâzihi’l-vesîka Âişe bt. Halil nâm hatun tarafından husûs-ı âti’z-zikrde tasdîka vekîl-i şer‘îsi Çubukçu Mustafa Beşe b. Ali nâm kimesne mahzarından ikrâr ve takrîr-i kelâm edip mahalle-i mezbûrede vâki‘ zevcem müvekkile-i mezbûre ile bi’l-ma‘iyye sâkin olduğum menzil derûnunda mevcûde eşyâ-i memlûkemden dört minder ve kıtık memlû yemenî yasdık ve bir çit döşek ve iki çit yorgan ve iki alaca anteri ve bir yeşil çuka ferâce ve iki bez gömlek ma‘a don ve dört sahan ve iki tencere ma‘a kapak ve bir sini ve bir tâbe ve bir hoşâb tası tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem müvekkilem mezbûre Âişe Hatun’a elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr elli guruş mütâlebesine müte‘allika da‘vâdan zevcem müvekkile-i mezbûrenin zimmetini ibrâ ve iskāt eylediğimde ol dahi ibrâ-i mezkûrumu kabûl eyledi fîmâ-ba‘d eşyâ-yı muharrere-i merkūme zevcem müvekkile-i mezbûre Âişe Hatun’un emvâl-i müşterâsı ve hakk-ı sırfı olup benim kat‘â alâka ve medhalim kalmamışdır dedikde gıbbe’t-tasdîk. Fî-selhi Muharrem sene [1]222.