Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 386 Hüküm no: 623 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe ve Mustafa Beşe’nin Reis Anaştaş v. Tohari’den kırk altı guruş alacaklarını tahsil edip emanet verdikleri üç varili de geri aldıkları Ashâb-ı sefâyinden olup husûs-ı âtîde kendi nefsinden asîl ve Mustafa Beşe b. Ahmed tarafından ber-vech-i câ’î vekîl olduğu Ahmed Beşe b. Mahmud ve Usta diğer Ahmed Beşe b. Ali nâm kimesneler şehâdetleriyle sâbit olan İbrahim Beşe b. ( ) nâm kimesne Galata’da mahfil-i kazâda sefîne reislerinden Anaştaş v. Tohari zimmî muvâcehesinde benim reis-i mersûm Anaştaş zimmî zimmetinden ba‘de külli’l-hesâb sefîne ücretinden alacağım olan on altı guruş ile mâlımdan yedine îdâ‘ ve teslîm eylediğim varil ve müvekkilim mezbûr Mustafa Beşe’nin dahi cihet-i karzdan alacağı olan otuz guruş ile zikrolunan üç aded varilleri bundan akdem reis-i mesfûrdan bi’l-asâle ve bi’l-vekâle da‘vâ eylediğimde ol dahi ikrâr u i‘tirâf eyledikden sonra meblağ-ı mecmû‘-ı merkūm kırk altı guruş ile zikrolunan üç aded varilleri bana bi-a‘yânihâ def‘ u teslîm eyledikde ben dahi bi’l-asâle ve bi’l-vekâle yedinden tamamen ahz u kabz edip târih-i i‘lâma gelince beynimizde cereyân eden cemî‘ hukūk-ı şer‘iyyeye müte‘allika âmme-i da‘vâdan reis-i mesfûrun zimmetini bi’l-asâle ve bi’l-vekâle ibrâ ve iskāt eylediğimde ol dahi ber-vech-i muharrer ibrâmı kabûl eyledi deyü ikrâr ve tasdîkleri tescîl bi’[l]-iltimâs huzûr-ı âlîlerine i‘lâm olundu. Fî-Saferi’l-hayr sene 1222.