Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 387 Hüküm no: 624 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Ahmed Beşe’nin kahve bedelinden alacağı olduğu iddiasıyla Mehmed Salih Beşe aleyhine açtığı davada on guruşa sulh olduğu Galata hısnı ebvâbından Azabkapısı dâhilinde sâkin Kahveci Ahmed Beşe b. el-Hâc Mehmed nâm kimesne Galata Bâb Mahkemesi’nde meclis-i şer‘de Mehmed Salih Beşe b. Süleyman nâm kimesne muvâcehesinde mezbûr Mehmed Salih Beşe zimmetinde bundan akdem yedimden ve mâlımdan iştirâ ve kabz eylediği vezn ve fiyatı beynimizde ma‘lûm kahve semeninden yirmi üç guruş on altı paradan bâkī on yedi guruş altı para alacak hakkım olmağla hâlâ taleb ederim deyü tasaddî eylediğim da‘vâmdan bâ-vesâtet-i muslihîn mezbûr Mehmed Salih Beşe ile on guruşa ba‘de’s-sulh ve’l-kabûl bedel-i sulh-ı merkūmdan mâ‘adâ yedi guruş altı paraya müte‘allika da‘vâdan mezbûr Mehmed Salih Beşe’nin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm on guruş zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi meblağ-ı merkūm on guruşun müdde‘î-i mezbûr Ahmed Beşe’ye edâsıyla mezbûr Mehmed Salih Beşe ilzâm olunduğu huzûr-ı âlîlerine i‘lâm olundu. Fî-selhi M sene 1222.