Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 388 Hüküm no: 626 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Sakızlı Cani v. Mike’nin kaba kahve bedelinden Agop v. Sefer’den dokuz yüz yetmiş guruş alacağı olduğu Galata’da Zincirli Han ittisâlinde mütemekkin tüccârdan Sakızlı Cani v. Mike nâm zimmî Galata Bâb Mahkemesi’nde meclis-i şer‘de Sivrihisar ahâlîsinden olup li-ecli’t-ticâre mahmiye-i İstanbul’da Mısırçarşısı kurbünde Sabuncu Hanı’nda mütemekkin Agop v. Sefer nâm zimmî muvâcehesinde sene-i sâbıkā Zi’lkadesi’nin yirmi sekizinci günü tarihiyle müverraha ve Kasımpaşa Mahkemesi’nde hâlâ nâibü’ş-şer‘i’l-kavîm olan Mîr-alemzâde Mehmed Sâdık Efendi’nin imzâ ve hatemini hâviye işbu hüccet-i şer‘iyye mantûkunca mersûm Agop zimmî zimmetinde ma‘lûmü’l-vezn kaba kahve semeninden bin iki yüz guruş alacak hakkım olmağla hattâ medyûnum mersûm Agop dahi cihet-i merkūmeden bana ol mikdâr guruş zimmetinde deyni olduğunu nâib-i mûmâ-ileyh efendi huzûrunda ikrâr u i‘tirâf edip ber-vech-i mübeyyen ikrârı hüccet olundukdan sonra meblağ-ı mezkûrun iki yüz yirmi guruşunu mersûm Agop zimmî bana def‘ u teslîm ben dahi yedinden ba‘de’t-tesellüm ve’l-ahz bâkī zimmetinde kalan dokuz yüz seksen guruşu mersûm Agop zimmîden taleb ederim deyü da‘vâ eyledikde ol dahi mazmûnu min-külli’l-vücûh takrîr-i meşrûhuna mutâbık bir kıt‘a hüccet-i mezkûreyi ibrâzıyla da‘vâ eyledikde ol dahi cevâbında benim müdde‘î-i mersûm Cani zimmîye deynim olmayıp hattâ eşyâ-bahâsından zimmetinde iki yüz yetmiş guruş alacağım var iken müdde‘î-i mersûm Cani zimmîye cihet-i merkūmeden ol kadar guruş zimmetimde deynim vardır deyü kâziben ikrâr etmişidim deyücek mukırr-ı mersûm Agop zimmî ber-vech-i meşrûh ikrârında kâzib ve müdde‘î-i mersûm Cani zimmî da‘vâsında mübtil olmadığına bi’t-taleb mersûm Cani zimmî ba‘de’t-tahlîfü’ş-şer‘î mûcebince mersûm Agop zimmî eşyâ semeninden iki yüz yetmiş guruş mütâlebesiyle bilâ-beyyine mu‘ârazadan ba‘de’l-men‘ ikrârıyla lâzım gelen meblağ-ı bâkī-i merkūm dokuz yüz yetmiş guruşu müdde‘î- i mersûm Cani zimmîye edâ ve teslîme mersûm Agop zimmîye tenbîh olunduğu huzûr-ı âlîlerine i‘lâm olundu. Fî 6 Safer sene [1]222.