Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 389 Hüküm no: 628 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duvarcı Yorgi v. Tarandafil’in duvarcılık ücretinden alacağı olduğu iddiasıyla Bakkāl Markar v. Natan aleyhine açtığı davada elli guruşa sulh olduğu Duvarcı Yorgi v. Tarandafil nâm [zimmî] Galata Bâb Mahkemesi’nde meclis-i şer‘de Bakkāl Markar v. Natan Yahûdi muvâcehesinde mersûm Markar Yahûdi zimmetinde duvarcılık ücretinden yüz altmış guruşdan bâkī seksen yedi guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-tavassut-ı Müslimîn mersûm Markar zimmî ile elli guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ otuz yedi guruşa müte‘allika da‘vâmdan mersûm Markar Yahûdi’nin zimmetini kabûlü hâvî ba‘de’l-ibrâ, ibrâdan müstesnâ bedel-i sulh-ı merkūm elli guruş Yahûdi-i mersûmun zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı merkūm elli guruşun müdde‘î-i mersûm Yorgi zimmîye edâsıyla mersûm Markar Yahûdi ilzâm olunduğu bi’[l]-iltimâs huzûr-ı âlîlerine i‘lâm olundu. Fî-selhi Muharrem sene 1222.