Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 392 Hüküm no: 635 Orijinal metin no: [62b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elenko bt. Yani’nin kendisine tecavüz ettiği iddiasıyla Mihal Reis aleyhine açtığı davada iddiasını ispat edemediği Galata hâricinde Kâtib Mustafa Çelebi Mahallesi’nde mütemekkin şahsı mu‘arrefe Elenko bt. Yani nâm Nasrâniye Galata Bâb Mahkemesi’nde meclis-i şer‘de sefîne reislerinden Katozlu Şerbetçi Mihal Reis v. Petro nâm zimmî muvâcehesinde Nasrâniye-i merkūmenin anası diğer Elenko bt. Vasil nâm Nasrâniye hâzır olduğu hâlde mersûm Mihal Reis târih-i i‘lâmdan altı ay mukaddem Galata’da Sultan Bayezid Mahallesi’nde Duhânî Filyos nâm zimmînin menzilinde vakt-i zuhrda cebren bana zinâ ve bekâretimi izâle etmekle mûcib-i şer‘îsini taleb ederim deyü eylediği da‘vâsını mersûm Mihal Reis ba‘de’l-inkâr Nasrâniye merkūme ber-vech-i muharrer müdde‘âsını bir vechile ityândan izhâr-ı acz edip reis-i merkūm ben târih-i merkūmda mârru’z-zikr Katoz kasabasında mütemekkin idim deyü eylediği def‘ini kasaba-i merkūme ahâlîlerinden Vasil v. Tanaş ve Yanaki v. Yorgo ve Panayot v. Paskal ve Zakari v. Kostantini ve Anatosni v. Nikola ve diğer Zakari v. Koko ve Manol v. İstirati ve Komata v. Yanaki ve Paris v. Andon ve Panayot v. Tarandafil ve Talogo v. Praşkova ve Asamaki v. Todori ve Fide v. Yanaki ve Mename v. Dimitri ve Yani v. Ramat ve diğer Yanaki v. Paskal nâm zimmîler şehâdetler[iyle] Nasrâniye-i merkūme muvâcehesinde mütevâtiren isbât etmeğin mûcebince müdde‘iye-i Nasrâniye-i merkūme Elenko da‘vâ-yı mezkûresiyle mersûm Mihal Reis zimmîye bî-vech mu‘ârazadan men‘ olunduğu bi’l-iltimâs [huzûr-ı âlîlerine i‘lâm olundu.] Fî 14 Safer sene [1]222.