Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 392 Hüküm no: 636 Orijinal metin no: [62b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin İsmail Beşe aleyhine açtığı alacak davasında altmış guruşa sulh olduğu Topçu neferâtından Trabzonî Hüseyin Beşe b. Mehmed nâm kimesne Galata Bâb Mahkemesi’nde meclis-i şer‘de İsmail Beşe b. Mehmed nâm kimesne muvâcehesinde mezbûr İsmail Beşe yedimde emvâlim olan mecmû‘u yüz elli altı guruş kıymetli bir Yatağan bıçağı bir tek piştov ve bir kır bârgir ve on üç vakıyye revgan-ı sâde ve on sekiz vakıyye tulum peyniri ve üç vakıyye iplik ve bir keçe ve bir çift tozluk ve bir fistanlık ve bir çift çorabımı bi-gayr-ı hak ahz ve istihlâk etmekle ba‘de’s-sübût kıymet-i şer‘iyyelerini mezbûr İsmail Beşe’den tazmîn taleb ederim deyü tasaddî eylediğim da‘vâmdan bâ-vesâtet-i muslihîn mezbûr İsmail Beşe ile ba‘de’s-sulh ve’l-kabûl bedel-i sulh-ı merkūmdan mâ‘adâ doksan altı guruşa müte‘allika da‘vâdan mezbûr İsmail Beşe’nin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm altmış guruş zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi meblağ-ı merkūm altmış guruşun müdde‘î-i mezbûr Hüseyin Beşe’ye edâsıyla mezbûr İsmail Beşe ilzâm olunduğu bi’l-iltimâs huzûr-ı âlîlerine i‘lâm olundu. Fî 11 Safer sene [1]222.