Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 393 Hüküm no: 637 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı Mehmed Tahir Ağa’nın Kürkçü Ohannes v. Serkiz’den üç yüz guruş alacağı olduğu Yorgancı Mehmed Tahir Ağa b. Mustafa nâm kimesne Galata Bâb Mahkemesi’nde meclis-i şer‘de Kürkçü Ohannes v. Serkiz nâm zimmî muvâcehesinde mersûm Ohannes zimmî ile oğlu gāib ani’l-meclis Serkiz zimmî zimmetlerinde cihet-i karzdan yedi yüz elli guruş alacak hakkım olup ve herbiri âharın zimmetine lâzım gelen meblağa kefîl ve zâmin oldukdan sonra meblağ-ı mezkûr yedi yüz elli guruşun dört yüz guruşunu zimmîyân-ı mersûmânın yedlerinden ba‘de’l-ahz bâkī kalan üç yüz elli guruşu mersûm Ohannes zimmîden asâlet ve kefâletine binâen taleb ederim deyü da‘vâ eyledikde ol dahi cevâbında herbirimiz âharın zimmetine lâzım gelen meblağa kefîl ve zâmin olmak üzere yedinden ancak yedi yüz guruş ahzını ikrâr ziyâde elli guruşu inkârından gayrı meblağ-ı bâkī-i merkūmun yüz elli iki buçuk guruşunu müdde‘î-i mezbûrun emriyle kayını gāib ani’l-meclis el-Hâc Yusuf’a vermişidim bâkī zimmetimde ancak yüz kırk yedi buçuk guruş müdde‘î-i mezbûre deynim kalmışdır deyü def‘ ve müdde‘î-i mezbûr ziyâde elli guruş müdde‘âsını isbâta ba‘de’l-havâle mersûm Ohannes zimmî mikdâr-ı mezkûrda eylediği def‘ini isbâta kādir olmayıp tâlib-i tahlîf dahi olmamağın ikrârı mûcebince meblağ-ı bâkī-i mezkûr üç yüz guruşu müdde‘î-i mezbûr Mehmed Tahir Ağa’ya edâ ve teslîme mesfûr Ohannes zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 10 Safer sene 1222.