Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 393 Hüküm no: 638 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Artin’in Kömürcü Osman Beşe’ye otuz guruş borcu olduğu Kömürcü Osman Beşe b. Süleyman nâm kimesne Galata Bâb Mahkemesi’nde meclis-i şer‘de Karabet v. Artin nâm zimmî muvâcehesinde mersûm Karabet zimmînin gāib ani’l-meclis Hâfız es-Seyyid Halil nâm kimesneye cihet-i deyn-i şer‘îden zimmetinde deyni olan kırk guruşu medyûnu gāib-i mezbûr es-Seyyid Halil’e bi-şartü’r-rücû‘ emriyle ben mâlımdan edâ ve teslîm edip meblağ-ı mezkûru nâtık işbu yedime karz unvânıyla bir kıt‘a deyn temessüğü dahi verdikden sonra meblağ-ı merkūm kırk guruşun on guruşunu mersûm Karabet zimmî yedinden ba‘de’l-ahz bâkī zimmetinde kalan otuz guruşu mersûm Karabet zimmîden bi’l-mürâca‘a taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını lede’t-tezkiye makbûlü’ş-şehâde idükleri ihbâr olunan İsmail b. Mustafa ve Hâfız Mehmed b. Veliyüddin nâm kimesneler şehâdetleriyle mersûm Karabet zimmî muvâcehesinde vech-i şer‘î üzere isbât etmeğin mûcebince meblağ-ı bâkī-i mezkûr otuz guruşu müdde‘î-i mezbûr Osman Beşe’ye edâ ve teslîme mesfûr Karabet zimmîye tenbîh olunduğu huzûr-ı âlîlerine i‘lâm olundu. Fî 5 Safer sene 1222.