Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 394 Hüküm no: 639 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Hıristo’nun alacağına kefaletinden dolayı Yorgi aleyhine açtığı davada yüz yirmi beş guruşa sulh olduğu Derûn-ı arzuhâlde mersûmü’l-ism Manav Hıristo v. Yakomi zimmî Galata’da mahfil-i kazâda sâhib-i arzuhâl Yorgi v. Dimitri zimmî muvâcehesinde benim gāib ani’l-beled İstemat zimmî zimmetinde cihet-i karzdan alacağım olan iki yüz elli guruşa mersûm Yorgi zimmî bi’l-emr ve’l-kabûl kefîl ve zâmin olmağla meblağ-ı mezkûru bi hükmi’l-kefâle mersûm Yorgi zimmîden taleb ederim deyü tasaddî eylediğim da‘vâmdan bâ-tavassut-i muslihîn yüz yirmi beş guruşa ba‘de’s-sulh ve’l-kabûl bedel-i sulh-ı mezkûrdan mâ‘âda yüz yirmi beş guruşa müte‘allika da‘vâdan mersûm Yorgi zimmînin zimmetini ba‘de’l-ibrâ ve’l-kabûl ibrâdan müstesnâ bedel-i sulh-ı merkūm yüz yirmi beş guruş mersûm Yorgi zimmînin zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihâ bedel-i sulh-ı merkūm yüz yirmi beş guruşun müdde‘î-i mersûm Hıristo zimmîye edâsıyla mersûm Yorgi zimmî ilzâm olunduğu bi’l-iltimâs huzûr-ı âlîlerine i‘lâm olundu el-emru li-men lehü’l emr. Fî 27 Muharremi’l-harâm sene 1222.