Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 395 Hüküm no: 642 Orijinal metin no: [63a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa’nın karısı Fâtıma Hatun aleyhine açtığı itâatsizlik davasında davalının kocasına itâat etmesinin tembih olunduğu Galata’da el-Hâc A‘mâ Mahallesi’nde sâkine ve zâtı mu‘arrefe Fâtıma bt. Halil nâm hatun Galata Bâb Mahkemesi’nde meclis-i şer‘de zevci Süleyman Ağa b. Hüseyin nâm kimesne muvâcehesinde mezbûr Süleyman Ağa zevc-i dâhilim olup beni infâk ve iksâ etmediğinden gayrı hilâf-ı şer‘-i mutahhar darb ve tekdîrden hâlî olmamağla tenbîh olunmak matlûbumdur deyü da‘vâ ol dahi cevâbında müdde‘iye-i mezbûre zevce-i medhûlün-bihâsı olduğunu ikrâr ber-vech-i muharrer darbını inkârından mâ‘adâ zevcem mezbûre bana itâ‘at ve inkıyâddan ibâ vü imtinâ‘ etmekle bana itâate zevcem mezbûreye tenbîh olunmak matlûbumdur deyü da‘vâ ve bu vechile beynlerinde ba‘de vukū‘i’l-münâza‘a beynleri ıslâh olunup fimâ-bâ‘d zevcesi mezbûreyi hilâf-ı şer‘-i mutahhar darbetmeyip infâk ve iksâya zevci mezbûr ve zevcesi mezbûre dahi zevc-i mezbûr Süleyman Ağa’ya itâ‘at ve inkıyâda zevcesi mezbûreden herbiri müte‘ahhid oldukları tescîl huzûr-ı âlîlerine i‘lâm olundu. Fî 12 Safer sene 1222.