Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 396 Hüküm no: 644 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa’da Kulaksız Mahallesi’ndeki Ermenilerin her sene yarım nefer kürek bedeli, yarım avârız hanesi ve dört yüz doksan altı buçuk akçe lağım vergisi vermeyi taahhüt ettikleri Mahrûse-i Galata’ya muzâfe kasaba-i Kasımpaşa’da Kulaksız nâm-ı diğer Yeniçeşme Mahallesi ahâlîsinden ashâb-ı arzuhâl Demirci Mardros v. Bedros ve Kuyumcu Serkiz v. Horos ve Cevâhirci Artin v. Haçador Dülbendci Avadis v. Serkiz nâm zimmîler mahrûse-i mezbûre mahkemesinde meclis-i şer‘-i <<şerîf-i>> münîrde mahrûse-i mezbûrede Sultan Bayezid Mahallesi’nde kâin Çercis Kenîsesi cemâatbaşılarından Avanis v. Abraham ve Haçador v. Avanis muvâcehelerinde herbiri takrîr-i kelâm ve ta‘bîr ani’l-merâm edip ve sâir Tersâne-i âmire ocaklığı için Âsitâne ve tevâbi‘i Ermeniyânı üzerlerine beher sene edâsı lâzım gelen yüz nefer bedel-i kürekciyândan mahrûse-i mezbûre ve muzâfâtının on dört ve bir sülüs hissesinden Hisar ve Kuruçeşme’nin yarımşar ve Ortaköy’ün bir ve sülüs ve Beşiktaş’ın bir ve Beyoğlu’nun bir buçuk ve Santa Marka’nın ve Bereketzâde’nin üç buçuk ve Sultan Bayezid’in üç ve sâlifü’l-beyân Kulaksız nâm-ı diğer Yeniçeşme’nin yarım nefer bedel-i küreği ve mahrûse-i mezbûre ve tevâbi‘î Ermeniyânının yirmi üç hâne-i avârızı olup tekâlif-i merkūme beher sene mahall-i merkūme kenîse cemâ‘atbaşıları ma‘rifetleriyle cem‘ ve Çercis Kenîsesi tahsîldârları re’yiyle mahalline edâ olunageldiği yedimizde olan tevârîh-i muhtelife ile müverrah selâtîn-i izâm [ta]raflarından verilen müte‘addid evâmir-i aliyye ve der-kenârlarda müstebân olmağla yirmi üç hâne-i avârızın on dört hâne ve bir sülüsü bedel-i kürek bir rub‘u misillü mahallât-ı merkūme ve mâ‘adâ sekiz hâne ve sülüsânını Mirgünoğlu ve Sarıyar (Sarıyer) ve Büyükdere ve Yeniköy Ermenileri beynlerinde ale’s-seviyye edâ ve teslîm etmek üzere mahrûse-i mezbûre ve tevâbi‘î Ermeniyân kenîselerinin cemâ‘atbaşıları ittifâkıyla edâya ta‘ahhüdlerini hâvî mukaddemâ kıbel-i şerî‘at-ı garrâdan i‘tâ olunan hüccet-i şer‘iyye mefhûmundan nümâyân olup ber-vech-i muharrer bedel-i kürek ve avârızdan ber-mantûk-ı evâmir-i aliyye yarımşar hissemizi beher sene mahallemiz[de] kâin Ayagop Kenîsesi cemâatbaşıları hâzırân bi’l-meclis Donik v. Agop ve Bedros v. Mardros ma‘rifetleriyle cemî‘ [cem‘] ve tahsîl ve Tersâne-i âmire’den verilen edâ tezkireleri mantûklarınca Çercis cemâ‘atbaşıları ile bi’l-ma‘iyye edâda muhâlefet yoğiken Çercis cemâ‘atbaşıları mesfûrân bu esnâda mikdâr-ı mezkûrdan ziyâde mesârif-i uhrâ zuhûr etti diyerek tekâlif mutâlebesiyle rencîdeden hâlî olmamalarıyla suâl olunup bi-gayr-ı vechin hareketleri men‘ olunmak matlûbumuzdur deyü mazmûnları takrîrlerine mutâbık evâmir-i aliyye ve senedât-ı mer‘iyye ibrâzıyla teşekkî eylediklerinde onlar dahi cevâblarında mazmûn-ı evâmir-i aliyye ve hüccet-i şer‘iyyeyi ikrâr u i‘tirâf lâkin mesârif-i uhrâyı ihdâsıyla kat‘â nesne mütâlebemiz olmayıp ancak bin yüz otuz iki senesi Muharremi’nin on ikinci günü tarihiyle müverrah yedimizde olup meclis-i şer‘de feth u kırâet olunan bir kıt‘a fermân-ı celîlü’ş-şânda tasrîh olunduğu üzere mahrûse-i mezbûre ve tevâbi‘î Ermeniyânın beher sene on dört bin iki yüz otuz akçe bedel-i lağım teklîfi olup <> mârru’z--zikr Kulaksız Mahallesi’nin tâm hissesine bâ-fermân-ı âlî tevzî‘an isâbet eden bu dört yüz doksan altı buçuk akçeyi dahi ber-mantûk-ı emr-i âlî edâ ve teslîm etmeleri için mersûmûna tenbîh olunmak matlûbumuzdur deyü beynlerinde ba‘de vukū‘i’l-münâza‘a beynleri ıslâh olunup fîmâ-ba‘d tekâlif-i merkūmeden ber-mantûk-ı evâmir-i aliyye yarım nefer bedel-i kürek ve yarım hâne-i avârız ve dört yüz doksan altı buçuk akçe bedel-i lağım hisselerini beher sene vakt ü zamânıyla ber-vech-i meşrûh edâ ve teslîme ta‘ahhüd eylediklerinde emvâl-ı mîrîye kesr u noksan terettüb etmemek için ta‘ahhüdleri kaydı mahalline şerh ve Tersâne-i âmire tarafına ilmuhaber ve tarafeyn münâza‘a ve muhâsamadan vikāye zımnında nizâm-ı mezkûr ilâ-mâ-şâ’e’l-mevlâ düstûrü’l-amel tutulmak için yedlerine bir kıt‘a fermân-ı celîlü’ş-şân inâyet ve ihsân buyrulmak bâbında istirhâm eyledikleri imtisâlen li’l-emri’l-âlî huzûr-ı âsafânelerine i‘lâm olundu. Fî 9 Z sene [1]221.