Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 397 Hüküm no: 645 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tunus Ocağı adına Tunus Valisi Hamuda Paşa’nın Ömer Ağa b. Mehmed Salih’den kırk bir bin yüz on guruş alacağı olduğu Sâdır olan fermân-ı âlîlerine imtisâlen zikri câ’î husûsu mahallinde fasl ü hasm için Vekāyi‘ Kâtibi Şerif Mehmed Emin Efendi b. el-Hâc Hüseyin dâ‘îleri me’zûnen bi’l-hükm irsâl olunup ol dahi Dîvânhâne-i âmire’de hâlâ Kapudan-ı deryâ vezîr-i rûşen-zamîr-i müşteri-tedbîr devletlü sa‘âdetlü Ali Paşa -yesserallâhu mâ-yürîd ve mâ-yeşâ- hazretlerinin kethüdâ-yı âlî-vakārlarına mahsûs odaya varıp huzûr-ı Müslimînde akd-i meclis-i şer‘-i şerîf-i nebevî eyledikde hâlâ Tunus Valisi Vezîr-i mükerrem Hamuda Paşa b. Ali b. Abdurrahman mukārinen bi-tevfîki’l-müste‘ân taraflarından husûs-ı âtîde vekîl olduğu Hasan Hoca b. Abdullah ve Kasım Reis b. Mustafa şehâdetleriyle mahzar-ı câhid-i âtîde ber-nehc-i şer‘î sâbit ve sübût-ı vekâletine hükm-i şer‘î lâhık olan sâhib-i arzuhâl Ser-dayı Tunuslu Mehmed Hoca b. Osman meclis-i ma‘kūd-ı mezkûrda sâbıkā Tunus Ocağı neferâtından olup el-yevm Âsitâne-i aliyye’de sâkin derûn-ı arzuhâlde ismi mezkûr Salih Çavuş demekle meşhûr Ömer Ağa b. Mehmed Salih muvâcehesinde mezbûr Ömer Ağa mârru’z--zikr Tunus Ocağı neferâtından iken bin iki yüz on beş senesi Recebi’nin onuncu günü ocağ-ı merkūm mâlından ve müvekkilim müşârun-ileyh Hamuda Paşa yedinden iktirâz ve kabz eylediği otuz yedi bin Mağrib riyâli ki el-yevm beheri beşer guruşa râyic olan Mısır mahbûbu hesâbı üzere sekiz bin iki yüz yirmi iki Mısır altını ve beheri yüz yirmi akçeye râyic olan esedî guruş hesâbı üzere kırk bir bin yüz on guruş zimmetinde kalmağla hâlâ taleb ederim deyü bi’l-vekâle ba‘de’d-da‘vâ ve’l-istintak ve’l-inkâr müdde‘î-i vekîl-i mezbûr Mehmed Hoca ber-vech-i meşrûh müdde‘âsını lede’t-tezkiye adl ve makbûlü’ş-şehâde idükleri ihbâr olunan Anadolu kuzâtı eşrâfından es-Seyyid Süleyman Efendi b. Muslı es-Seyyid Ali ve Ömer Alemdâr b. Mehmed şehâdetleriyle muvâcehesinde vech-i şer‘î üzere isbât etmeğin mûcebince meblağ-ı merkūm kırk bir bin yüz on guruşu müvekkili Paşa-yı müşârun-ileyh için vekîli müdde‘î-i mezbûr <> Mehmed Hoca’ya edâ ve teslîme mezbûr Ömer Ağa’ya tenbîh eylediğini mezbûr dâ‘îleri mahallinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikde ba‘de’t-tenfîz ve’t-tescîl Galata Mahkemesi’nden bi’l-iltimâs huzûr-ı âlîlerine i‘lâm olundu. Fî 9 Muharrem sene [1]222.