Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 398 Hüküm no: 646 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kader bt. Bedros’un akıl sağlığını kaybeden oğlu Kirkor v. Bogos’un özel bir mahalle konulmasını istediği Mahrûse-i Galata hâricinde Hüseyin Ağa Mahallesi’nde mütemekkine şahs-ı vech-i şer‘î üzere mu‘arrefe Kader bt. Bedros nâm Nasrâniye meclis-i şer‘-i şerîf-i enverde takrîr-i kelâm ve ta‘bîr ani’l-merâm edip sadrî oğlum on üç yaşında Kürkçü Kirkor v. Bogos’a yirmi günden beri cünûn ârız olup muhtellü’d-dimâğ olduğu hâlde esvâk ve pazarda leylen ve nehâren serseri geşt ü güzâr ve mârreye ve hem-civârlarımıza itâle ve tekdîrden hâlî olmamağla husûs-ı merkūm mahalle-i mezbûre ahâlîsinden olup li-ecli’l-ihbâr meclis-i şer‘-i münîrde hâzirûn olanlardan lede’l-istifsâr bu misüllû muhtellü’d-dimâğ olanları ifâkat buluncaya değin mahâll-i mahsûsaya vaz‘ olunagelmekle mecnûn-ı merkūm dahi vaz‘ olunmak murâdımdır dedikde mahalle-i merkūme müezzini es-Seyyid Mehmed Emin Efendi ile ahâlîsinden Bağdasar ve Aleksan ve Moğsis ve Haçador zimmîler dahi mukırre-i mersûmeyi tasdîk ve ber-vech-i meşrûh mahâll-i mahsûs olan Ermeni tâifesinin iskân ed[il]egeldikleri mahalle vaz‘ı bâbında fermân-ı âlîleri sudûrunu istid‘â ve istirhâm eyledikleri mahrûse-i mezbûre Bâb Mahkemesi’nde huzûr-ı âlîlerine i‘lâm olundu. Fî 22 Safer sene 1222.