Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 399 Hüküm no: 648 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazzaz Avanis’in kefaletinden dolayı dört yüz yirmi dokuz guruş alacağını ödemesi için Şerbetçi Diyon’a altmış bir gün süre verdiği Sâhib-i arzuhâl Kazzâz Avanis v. Bedros zimmî Galata’da mahfil-i kazâda derûn-ı arzuhâlde mersûmü’l-ism Şerbetçi Diyon v. Karabet zimmî muvâcehesinde benim mersûm Diyon zimmînin li-ebeveyn er karındaşı gāib ani’l-meclis Bedros zimmî zimmetinde beynimizde ma‘lûmü’l-mikdâr kazzâz metâ‘ı semeninden alacak hakkım olan dört yüz yirmi dokuz guruşa bi’l-emr ve’l-kabûl mersûm Diyon zimmî kefîl ve zâmin olmağla meblağ-ı merkūm dört yüz yirmi dokuz guruşu bi-hükmi’l-kefâle mersûm Diyon zimmîden taleb ederim deyü da‘vâ eyledikde ol dahi cevâbında ber-vech-i muharrer ikrâr u i‘tirâf edip lâkin deyn-i meblağ-ı mezkûru mesfûr Diyon zimmî def‘aten bana edâya kudreti olmadığı ecilden târih-i i‘lâmdan altmış bir gün tamamında tamamen bana edâ ve teslîm etmek üzere mersûm Diyon zimmîyi tecîl eylediğimde ol dahi meblağ-ı mezkûr dört yüz yirmi dokuz guruşu ecel-i mezkûr hulûlünde tamamen bana edâ ve teslîme ta‘ahhüd eyledi deyü ikrâr ve tasdîkleri tescîl ve mübâşirleri Ali Çavuş kulları yediyle bi’l-iltimâs huzûr-ı âlîlerine i‘lâm olundu. Fî 14 Safer sene 1222.