Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 399 Hüküm no: 649 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Kerupe’nin Alacacı Aci Manuk’tan dokuz yüz guruş alacağı olduğu Galata hâricinde Hüseyin Ağa Mahallesi’nde mütemekkin Kuyumcu Kerupe v. Manatsafan nâm zimmî Galata Bâb Mahkemesi’nde meclis-i şer‘de Alacacı Aci Manuk v. Aslan zimmî muvâcehesinde mersûm Aci Manuk zimmî zimmetinde târih-i i‘lâmdan on üç ay mukaddem yedimden ve mâlımdan safka-i vâhide ile iştirâ ve kabz eylediği biri kuş ve biri kelebek resimlerinden iki kıt‘a elmaslı çiçek semeninden dokuz yüz guruş alacak hakkım olmağla hâlâ taleb ederim deyü ba‘de’d-da‘vâ ve’l-inkâr müdde‘î-i merkūm Kerupe zimmî ber-vech-i muharrer müdde‘âsını lede’t-tezkiye ve makbûlü’ş-şehâde idükleri ihbâr olunan Cevâhirci Matatya v. Vartaris ve Kuyumcu Aci Minas v. Ağyazar nâm zimmîler şehâdetleriyle mersûm Aci Manuk muvâcehesinde vech-i şer‘î üzere isbât etmeğin mûcebince meblağ-ı mezkûr dokuz yüz guruşu müdde‘î-i mersûma edâ ve teslîme mersûm Aci Manuk zimmîye tenbîh olunduğu bi’l-iltimâs [huzûr-ı âlîlerine i‘lâm olundu.] Fî 25 S sene [1]222.