Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 400 Hüküm no: 650 Orijinal metin no: [64a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tomtom Mehmed Kapudan Mescidi imamı Ali Efendi b. Hüseyin’in başka vakıftan ücretinin ödenmesi talebinin meşru olmadığı Nezâreti dâ‘îlerine meşrûta evkāfdan mahrûse-i Galata hâricinde Tomtom Mehmed Kapudan Mescid-i şerîfi imâmı Ali Efendi b. Hüseyin mahrûse-i mezbûrede mahfil-i kazâda Sefer Kethüdâ Vakfı’nın ber-vech-i meşrûta mütevelliyesi Nâile Hanım bt. eş-Şeyh Abdülfettâh Efendi’nin zevci ve tarafından husûs-ı âtîde vekîl-i müsecceli Hâfız Efendi b. el-Hâc Mustafa muvâcehesinde müvekkile-i mütevelliye-i mezbûre Nâile Hanım’ın babası mezbûr Şeyh Abdülfettâh Efendi mârru’z--zikr Tomtom Mescid-i şerîfi’ne müceddeden minber vaz‘ eyledikde vazîfe-i ma‘lûme ile beni hatîb ta‘yîn ve ihdâs eylediği sâir erbâb-ı cihâtın vazîfelerini hayâtında mâh be-mâh edâ ve teslîm eyledikden sonra bu esnâda mezbûr Abdülfettâh Efendi düyûnu terekesinden ezyed olduğu hâlde vefât edip nukūd-ı mevkūfe zâyî‘ ve telef olduğu ecilden bizim ihdâs olunan cihât vazîfelerine dahi nesne kalmamış idi lâkin müteveffâ-i mezbûr hayâtında kızı mezbûre Nâile Hanım’ın mütevelliye olduğu Sefer Kethüdâ Mescidi’ne vaz‘ eylediği diğer minber vakfının el-yevm mevcûd gallesi olmağla galle-i mevcûdeyi mesbûku’z-zikr Sefer Kethüdâ Vakfı ve mürtezikasına rakabe üzere tevzî‘ edip fazlasından benim vazîfemi edâ eylesin deyü tasaddî eylediği da‘vâsı takrîr-i meşrûha üzere eğerçi zikirleri mürûr eden Sefer Kethüdâ ve Tomtom Mehmed Kapudan mescidlerine vaz‘ olunan minberlerin vâkıfı zât-ı vâhid olup lâkin vakıfları başka başka olmağla ehadühümâ âhara mugāyir ve şürûtları dahi muhâlif olduğu vakfiyeleri mefhûmundan ve müdde‘î hatîb-i merkūmun takrîrinden müstebân olmağın kütüb-i fıkhiyyeden Bezzâziyye’nin; vakf-ı menkūlünde; “ize’ttehade’l-vâkıfü ve’htelefete’l-cihetü bi-en kâne mesciden ve medreseten ve uyyine li-külli vakfin galletün li-ehadihimâ lâ yübeddelü şartü’l-vâkıf” deyü mastûr bulunmağın bu sûretde müdde‘î hatîb-i merkūmun galle-i vakf-ı âhardan vazîfe mütâlebesi meşrû‘a ve mu‘tebere olmayıp vekîl-i mütevellî-i mezbûr Muhâfız Ahmed Efendi’ye suâl dahi teveccüh etmediği tescîl bi’[l]-iltimâs huzûr-ı âlîlerine i‘lâm olundu. Fî 17 Safer sene 1222.