Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 403 Hüküm no: 657 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakızlı Benefşe Nikoli’nin karzdan Mihal Pandelos’dan elli guruş alacağı olduğu Galata’da mütemekkin şerbetçi hizmetkârlarından Sakızlı Benefşe Nikoli v. Mihal zimmî Galata Bâb Mahkemesi’nde meclis-i şer‘de Mihal Pandelos v. Yorgi zimmî muvâcehesinde mersûm Mihal zimmî zimmetinde cihet-i karzdan alacak hakkım olan elli guruşu hâlâ taleb ederim deyü da‘vâ ettikde ol dahi ikrâr lâkin meblağ-ı merkūmu müdde‘î-i mersûma târih-i i‘lâmdan üç ay mukaddem def‘ ve teslîm etmişidim deyü eylediği def‘ini mersûm Nikoli inkârından mâ‘adâ cihet-i merkūmeden elli guruş bana deyni olduğunu mersûm Mihal zimmî bir hafta mukaddem Galata’da Pencşenbe Pazarı’nda sûkda mahzar-ı şuhûdda ikrâr ve işhâd etmişidi deyü eylediği def‘ bi’d-def‘ini lede’t-tezkiye şehâdetleri makbûle olan es-Seyyid Feyzullah Efendi b. Salih ile Nikoli v. Kostantin ve Dülbendci Simon v. Norsiz zimmî şehâdetleriyle bi’l-muvâcehe isbât etmeğin mûcebince meblağ-ı merkūm elli guruşu mersûm Benefşe Nikoli zimmîye edâ ve teslîme mersûm Mihal Pandelos zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 28 Safer sene 1222.