Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 404 Hüküm no: 658 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Seyyid Hacı Molla Ömer’in tasarrufunda olan vakıf menzilin vekili tarafından başkasına devredilmeyeceği Vilâyet-i Anadolu’da Kemah kazâsında Kuruçay kasabası kurâsından Çoruhiye? nâm karye ahâlîsinden Mertebeci es-Seyyid el-Hâc Molla Ömer b. Musa nâm kimesnenin er karındaşı oğlu ve tarafından husûs-ı âtîde vekîl olduğu Hasan b. Habib ve es-Seyyid Mustafa b. İbrahim nâm kimesneler şehâdetleriyle sâbit olan Dergâh-ı âlî topçuları yirmi yedi cemâ‘atin neferâtından sâhib-i arzuhâl Hayrullah Beşe b. Ali nâm kimesne Galata Bâb Mahkemesi’nde meclis-i şer‘-i münîrde nezâreti dâ‘îlerine meşrûta evkāfdan merhûm Haffâf el-Hâc Mehmed nâm sâhibü’l-hayrın Galata’ya muzâfe kasaba-i Tophâne’de Ekmekçibaşı Mahallesi’nde vâki‘ mekteb-i münîfi vakfının mütevellîsi Çukadâr İbrahim b. İsmail Efendi muvâcehesinde vakf-ı mezbûr müstegallâtından mahalle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzil ammim müvekkil-i mezbûr es-Seyyid el-Hâc Molla Ömer’in bâ-temessük-ı mütevellî bi’l-icâreteyn tasarrufunda iken bundan akdem ammim mezbûr menzil-i merkūmu bedel-i misliyle âhara ferağa beni tarafından mukaddemâ tevkîl etmekle ben dahi vekâleti kabûl ve menzil-i merkūmu bi’l-vekâle âhara ferağ murâd eylediğimde mütevellî-i mezbûr İbrahim Ağa bi-gayr-ı vechin mümâna‘at etmekle mümâna‘atı men‘ olunmak matlûbumdur deyü bi’l-vekâle da‘vâ eyledikde mütevellî-i mezbûr İbrahim dahi cevâbında menzil-i mezkûr merkūm es-Seyyid el-Hâc Molla Ömer’in ber mantûk-ı temessük-ı mezkûr bi’l-icâreteyn tasarrufunda iken mezbûr es-Seyyid el-Hâc Molla Ömer bundan akdem Şam-ı Şerîf’de Amâra nâm mevki‘de bilâ-veled fevt oldukda menzil-i merkūm mahlûl ve taraf-ı vakfa âid ve râci‘ olmağla binâen-aleyh menzil-i mezkûru bi’t-tevliye taraf-ı vakf-ı merkūm için zabt ederim deyü eylediği da‘vâsını hîn-i vefâtında Şam-ı Şerîf’de bulunup bi’l-mu‘âyene salâtına hâzır ve defnine nâzır olanlardan lede’t-tezkiye makbûlü’ş-şehâde idükleri ihbâr olunan es-Seyyid el-Hâc Ali b. es-Seyyid el-Hâc Mehmed ve el-Hâc İbrahim b. el-Hâc Ahmed nâm kimesneler şehâdetleriyle mezbûr Hayrullah Beşe muvâcehesinde vech-i şer‘î üzere isbât etmeğin mûcebince mezbûr Hayrullah Beşe da‘vâ-yı mezkûresiyle bî-vech mu‘ârazadan ba‘de’l-men‘ menzil-i mezkûru mütevellî-i mezbûr İbrahim taraf-ı vakf-ı merkūm için bi’t-tevliye zabt iktizâ eylediği mahkeme-i mezbûrede tescîl ve mübâşirleri Çukadâr İsmail kulları yediyle bi’[l]-iltimâs huzûr-ı âlîlerine i‘lâm olundu. Fî 26 Safer sene 1222.