Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 405 Hüküm no: 659 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tasarrufunda olan vakıf menzil arsası üzerine ev yapan Boyacıoğlu Agop ile aralarında hiçbir husumet olmadığının Bereketzâde Mahallesi ahalisi tarafından ikrar edildiği Mahrûse-i Galata mahallâtından Bereketzâde Mahallesi imâmı es-Seyyid Ali Efendi b. Mehmed Murad ve müezzini es-Seyyid Hasan Efendi b. Ahmed ve ahâlîsinden Hallâcî el-Hâc Ya‘kub Ağa b. Ahmed ve el-Hâc Osman Ağa b. Abdullah ve Ihlamurcu Mehmed b. el-Hâc Hüseyin ve Çilingir Molla Ya‘kub b. es-Seyyid Mehmed ve Cüllâhcı el-Hâc Ali b. Hüseyin ve Halâtçı el-Hâc Mehmed b. el-Hâc Mahmud ve Subaşı-i sâbık Halil Beşe b. Osman ve Hüseyin Ağa b. el-Hâc Ali ve es-Seyyid Ebûbekir Ağa b. el-Hâc Mehmed ve Mehmed Said b. Mustafa ve Molla Yahya b. Hüseyin ve el-Hâc Ahmed b. İbrahim ve Ases Ahmed Beşe b. Ali nâm kimesneler mahrûse-i mezbûre Bâb Mahkemesi’nde meclis-i şer‘de mahalle-i mezbûre mütemekkinlerinden Boyacıoğlu Agop zimmînin sulbî kebîr oğlu ve tarafından husûs-ı atîde vekîl-i mürseli Andon zimmî muvâcehesinde herbiri takrîr-i kelâm ve ta‘bîr ani’l-merâm edip müvekkil-i merkūm Agop zimmînin bi’l-icâreteyn tasarrufunda olup mahalle-i mezbûrede kâin ma‘lûmü’l-hudûd bir bâb vakıf menzili mahrûse-i mezbûrede bundan akdem vukū‘ bulan harîkde muhterik olup arsa-yı sırfa kaldıkda müvekkil-i mersûm arsa-yı mezbûre üzerine müceddeden binâ ve inşâ eylediği menzilinin ebniyesine dâir müvekkil-i mersûm Agop zimmî ile bizim kat‘â ve aslâ husûmet ve teşekkîmiz yokdur deyü sâdır olan takrîrleri bi’l-iltimâs huzûr-ı âlîlerine i‘lâm olundu. Fî-selhi Safer sene [1]222.