Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 406 Hüküm no: 661 Orijinal metin no: [65a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin kendisini dövüp yaraladığı iddiasıyla Seyyid Ebûbekir Beşe aleyhine açtığı davada yetmiş guruşa sulh olduğu Mahrûse-i Galata voyvodası aseslerinden sâhib-i arzuhâl Subaşı-i sâbık Halil Beşe b. Osman mahrûse-i mezbûrede mahfil-i kazâda derûn-ı arzuhâlde mezkûrü’l-ism Subaşı-yı esbak es-Seyyid Ebûbekir Beşe b. İslâm muvâcehesinde işbu târih-i i‘lâmdan yetmiş beş gün mukaddem mahrûse-i mezbûrede mezbûr Ebûbekir Beşe Yatağan bıçağı ile sol kolumun pazusu üzerinden amden bi-gayr-ı hakkın darb ve cerh etmekle mûcib-i şer‘îsini mezbûr Ebûbekir Beşe’den taleb ve da‘vâya tasaddî eylediğimde beynimize muslihîn tavassut edip ben da‘vâ-yı mezkûremden mezbûr Ebûbekir Beşe ile yetmiş guruş bedel-i makbûza sulh olduğumda ol dahi sulh-ı mezkûru ba‘de’l-kabûl cerh-i mezkûre ve mâ-yahdesü-minhe ve bedel-i sulh-ı merkūma müte‘allika âmme-i da‘vâdan herbirimiz âharın zimmetini ibrâ [65b] ve iskāt ve herbirimiz ber-vech-i muharrer âharın ibrâsını kabûl-birle kat‘-ı münâza‘a ve ref‘-i husûmet eyledik deyü ikrâr ve tasdîkleri tescîl ve mübâşirleri Abdullah Çavuş kulları yediyle huzûr-ı âlîlerine i‘lâm olundu. Fî-selhi Safer sene 1222.