Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 406 Hüküm no: 662 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Otuz beş sene önce vefât eden Osman’ın tasarrufundaki vakıf menzil üzerinde tasarruf hakları olduğu iddiasıyla vârislerinin açtığı davanın meşru olmadığı Derûn-ı arzuhâlde isimleri mezkûr Kalyoncu Mustafa Beşe ve zâtları mu‘arrefe Hadice ve Habibe evlâd-ı Osman Galata’da meclis-i şer‘-i münîrde kasaba-i Kasımpaşa’da sâkin sâhibe-i arzuhâl Şerife Sâliha bt. es-Seyyid Mustafa b. Abdullah tarafından husûs-ı âti’z-zikrde vekîl olduğu zâtını ârifân el-Hâc Ahmed Ârif b. Osman ve Ahmed Beşe b. İsmail nâm kimesneler şehâdetleriyle sâbit olan el-Hâc Ömer Ağa b. el-Hâc Ahmed nâm kimesne muvâcehesinde nezâreti dâ‘îlerine meşrûta evkāfdan el-Hâc Nureddin Vakfı’nın ber-vech-i meşrûta mütevelliyesi Fâtıma tarafından el-Hâc Mustafa Ağa hâzır olduğu hâlde vakf-ı merkūm müstegallâtından kasaba-i mezbûrede Seyyid Ali Çelebi Mahallesi’nde vâki‘ ma‘lûmü’l-hudûd bir bâb vakıf menzile babamız mezbûr Osman bi’l-icâreteyn mutasarrıf iken târih-i i‘lâmdan otuz beş sene mukaddem menzil-i mezkûru yüz elli guruş bedel mukābelesinde Sakkāoğlu Ali Beşe’ye bâ-re’y-i mütevellî vefâen fâriğ olup ba‘dehû mezbûr Ali Beşe dahi bâ-re’y-i mütevellî müvekkile-i mezbûre Şerife Sâliha Hatun’a ferağ-ı kat‘î-i mu‘teber ile fâriğ oldukdan sonra bir sene mürûrunda babamız mezbûr Osman Beşe fevt olup bu vechile menzil-i mezkûr âdiyyen bize intikāl etmiş olmağla babamız müteveffâ-i mezbûrun bedel nâmıyla makbûzu olan yüz elli guruşu bizden ahz-birle menzil-i mezkûru bâ-re’y-i mütevellî bize ferağa müvekkile mezbûre Şerife Sâliha Hatun’a tenbîh olunmak matlûbumuzdur deyü da‘vâ eylediklerinde vekîl-i mezbûr dahi cevâbında husûs-ı mezkûru külliyen inkârından gayrı müdde‘ûn-ı mezbûrûn müddet-i merkūmeden beri müvekkile-i mezbûre Şerife Sâliha Hatun ile bir beldede sâkinler olup bu müddetde bilâ-özr-i şer‘î sükūt ve terk-i da‘vâ eylediklerini herbiri mukırr u mu‘terif iken bu misillû bilâ-özr-i şer‘î otuz beş sene mürûr eden hukūk da‘vâsını bilâ-emr-i âlî istimâ‘ından hükkâm-ı şer‘ memnû‘lar olmağın ol vechile da‘vâlarına bilâ-emr iltifât olunmadığı mübâşirleri el-Hâc Mehmed Çavuş kulları yediyle bi’l-iltimâs huzûr-ı âlîlerine i‘lâm olundu. Fî 27 Safer sene [1]222