Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 407 Hüküm no: 663 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanako v. Andon’un verdiği emanet parayı kendisine iade etmesi talebiyle Yorgi v. İstemat aleyhine açtığı davada iddiasını ispat edemediği Şerbetçi hizmetkârlarından Yanako v. Andon zimmî Galata Bâb Mahkemesi’nde meclis-i şer‘de şerbetçi ustalarından Yorgi v. İstemat zimmî muvâcehesinde mersûm Yorgi zimmînin Galata’da Karaköy nâm mahalde vâki‘ mütemekkin olduğu şerbethânesinde kendüye ücret kavlinsiz üç ay eylediğim hizmetimin ecir-i misli ile ba‘zı kimesneler bahşiş nâmıyla bana ihdâ ben dahi mersûm Yorgi yedinde bi’l-emâne vaz’ ve teslîm eylediğim yüz elli guruşu mersûm Yorgi zimmîden taleb ve istirdâd ederim deyü ba‘de’d-da‘vâ ve’l-inkâr müdde‘î-i mersûm Yanako zimmî ber-vech-i muharrer müdde‘âsına ikāmet-i beyyine edemeyip bi’t-taleb mersûm Yorgi zimmî ba‘de’t-tahlîfü’ş-şer‘î mûcebince müdde‘î-i mersûm Yanako zimmî da‘vâ-yı mezkûresiyle mersûm Yorgi zimmîye bilâ-beyyine mu‘ârazadan men‘ olunduğu bi’l-iltimâs [huzûr-ı âlîlerine i‘lâm olundu.] Fî 2 Ra sene [1]222.