Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 408 Hüküm no: 665 Orijinal metin no: [65b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazzaz Karabet’in satması için verdiği şal bedelinden Maryem bt. İstefan’dan beş yüz guruş alacağı olduğu Galata hâricinde Kamer Hatun Mahallesi’nde mütemekkin Kazzâz Karabet v. Ohannes nâm zimmî Galata Bâb Mahkemesi’nde meclis-i şer‘de Galata’da Bereketzâde Mahallesi’nde mütemekkine mu‘arrefetü’ş-şahs Maryem bt. İstefan nâm Nasrâniye muvâcehesinde ben târih-i i‘lâmdan sekiz ay mukaddem yedimde mâlım olan münakkaş bir kaftanlık yeşil Lahor şalımı beş yüz guruş semen-i makbûza âhar kimesneye bey‘ ve semen-i mezkûru bana teslîm eyle deyü tarafımdan Nasrâniye-i merkūmeyi emr ve tevkîl ol dahi ba‘de’l-kabûli’l-vekâle zikrolunan şalı yedine teslîm ol dahi ba‘de’l-kabz hilâf-ı emrim olan nesî’eten beş yüz guruşa âhara bey‘ ve teslîm etmekle semen-i mezkûr beş yüz guruşu Nasrâniye-i merkūmeden tazmîn taleb ederim deyü da‘vâ ettikde ol dahi husûs-ı mezkûru bi-tamâmihâ tav‘an ikrâr u i‘tirâf etmeğin alâ-mûcibi ikrârihâ meblağ-ı mezbûr beş yüz guruşu müdde‘î-i merkūm Karabet zimmîye bi-tarîkı’z-damân edâ ve teslîme mersûme Maryem Nasrâniye’ye tenbîh olundukdan sonra Nasrâniye-i mersûme meblağ-ı merkūm beş yüz guruşu târih-i i‘lâmdan on beş gün tamamına müdde‘î-i mersûma tamamen edâ ve teslîme ta‘ahhüd eyledikde müdde‘î-i merkūm dahi râzı olduğu huzûr-ı âlîlerine i‘lâm olundu. Fî 27 Safer sene 1222.