Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 409 Hüküm no: 668 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duhanî Ohannes v. Bedros’un alacaklısı Abdullah Beşe huzurunda fakirliğini ispat etmesi üzerine hapisten tahliyesine karar verildiği Hâmiş-i arzuhâlde mastûr derkenâr nâtık olduğu üzere Abdullah Beşe nâm kimesneye ma‘lûmü’l-vezn kahve semeninden bâ-i‘lâm-ı şer‘î mahkûmün-bih üç yüz doksan guruş deyni tahlîsi için yüz on altı günden beri Galata zindânında mahbûs olan sâhib-i arzuhâl Duhânî Ohannes v. Bedros zimmî Galata Bâb Mahkemesi’nde meclis-i şer‘-i münîrde dâyini olup derûn-ı arzuhâlde mezkûrü’l-ism mezbûr Abdullah Beşe muvâcehesinde benim mezbûr Abdullah Beşe’ye cihet-i mezkûreden ol mikdâr ve hâzır bi’l-meclis duhân tüccârından Kiryako v. Yanako zimmîye ma‘lûmü’l-vezn duhân semeninden bin beş yüz seksen dört guruş zimmetimde deynim olup lâkin ben mu‘sir ve mu‘dim olup işbu köhne libâsımdan gayrı ism-i mâl ıtlâk olunur nesnem olmamağla bir vechile edâ-yı deyne kudretim olmamağın sebîlim tahliye olunmak matlûbumdur deyü asârını iddi‘â eyledikde yesâr beyyinesi evlâ olmağın dâyin-i mezbûrdan beyyine taleb olundukda ikāmet-i beyyineden izhâr-ı acz-birle medyûn-ı mersûm asâr müdde‘âsını lede’t-tezkiye şehâdetleri makbûle olan Berber Molla Ahmed b. Abdullah ve Berber Molla Ali b. Mehmed ve el-Hâc Hüseyin b. Mehmed ve Hüseyin Beşe b. Mustafa ve Mehmed Beşe b. Osman şehâdetleriyle bi’l-muvâcehe isbât etmeğin mûcebince medyûn-ı mersûmun asârı zâhir olmağla habsden ıtlâk olunup vech-i şer‘î üzere yesârı sâbit olmadıkça habsi meşrû‘ olmadığı tescîl ve mübâşir mezbûr Ali Çavuş kulları yediyle huzûr-ı âlîlerine i‘lâm olundu. Fî-selhi Safer sene [1]222.