Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 410 Hüküm no: 669 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Abraham’ın çivi bedelinden alacağı olduğu iddiasıyla Çivici Parsih aleyhine açtığı davada iddiasını ispat edemediği Medîne-i Üsküdar’da Yenimahalle’de mütemekkin Bogos v. Abraham nâm zimmî Galata Bâb Mahkemesi’nde meclis-i şer‘de Çivici Parsih v. Karabet nâm zimmî muvâcehesinde mersûm Parsih zimmî zimmetinde vezn ve fiyatı beynimizde ma‘lûm mismâr semeninden yüz yirmi buçuk guruşdan bâkī seksen beş guruş alacak hakkım olmağla hâlâ taleb ederim deyü ba‘de’d-da‘vâ ve’l-inkâr müdde‘î-i mersûm Bogos zimmî bundan akdem medîne-i merkūme mahkemesinde mersûm Parsih zimmî ile husûs-ı mezkûru bi-aynihî da‘vâ ve müdde‘âsını isbâta kādir olmayıp mersûm Parsih zimmîyi istihlâf eylediği bir kıt‘a i‘lâm-ı şer‘î nâtık olup müdde‘î-i mersûm Bogos zimmî ber-vech-i muharrer müdde‘âsını isbât için meclis-i şer‘a ikāmet eylediği üç nefer zimmîler müdde‘î-i mersûmun da‘vâsına mutâbık edâ-yı şehâdet-i şer‘îye edememeleriyle hayyiz-i kabûlde makbûle olmayıp cerh olmalarıyla mûcebince müdde‘î Bogos zimmî da‘vâ-yı mezkûresiyle mersûm Parsih zimmîye bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 4 Rebî‘ülevvel sene 1222.