Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 410 Hüküm no: 671 Orijinal metin no: [66a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. İstefan sattığı çevre ve uçkur bedelinden Yasef v. Sabatay’dan yüz yirmi sekiz guruş alacağı olduğu ve taksitle ödenmesine izin verdiği Galata’da Bereketzâde Mahallesi’nde mütemekkine Maryem bt. İstefan nâm Nasrâniye Galata Bâb Mahkemesi’nde meclis-i şer‘de Yasef v. Sabatay nâm Yahûdi muvâcehesinde Yahûdi-i mersûm zimmetinde bundan akdem yedimden ve mâlımdan iştirâ ve kabz eylediği adedi ve fiyatı beynimizde malûm çevre ve uçkur semenlerinden yüz altmış iki guruş on paradan bâkī yüz yirmi sekiz guruş on para alacak hakkım olmağla hâlâ taleb ederim deyü da‘vâ ol dahi ber-vech-i muharrer ikrâr u i‘tirâf edip lâkin Yahûdi-i mersûm meblağ-ı bâkī-i mezkûr yüz yirmi sekiz guruş on parayı def‘aten edâya kudreti olmayıp târih-i i‘lâmdan on beş gün tamamında tamamen bana edâ etmek üzere ben Yahûdi-i mersûmu tecîl ve taksît eylediğimde ol dahi meblağ-ı bâkī-i mezkûru ecel-i mezkûr hulûlünde tamamen bana edâya ta‘ahhüd eyledi deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 3 Ra sene [1]222.