Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 412 Hüküm no: 674 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Aci Mardros’un havaleden Arnavut Halil b. Süleyman’dan beş yüz doksan beş guruş alacağı olduğu Hâmilü’l-i‘lâm Kuyumcu Aci Mardros v. Karabet nâm zimmî Galata Bâb Mahkemesi’nde meclis-i şer‘-i münîrde habbâz tablakârlarından Arnavud Halil b. Süleyman muvâcehesinde mezbûr Halil zimmetinde cihet-i havâle-i mukayyede-i sahîha-i şer‘iyyeden bâ-temessük alacak hakkım olan beş yüz doksan beş guruşu bi-hükmi’l-havâle hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr u i‘tirâf etmeğin mûcebince meblağ-ı merkūm beş yüz doksan beş guruşun müdde‘î-i merkūm Aci Mardros zimmîye edâsıyla mezbûr Halil ilzâm olunduğu bi’[l]-iltimâs huzûr-ı âlîlerine i‘lâm olundu. Fî 7 Rebî‘ülevvel sene 1222.