Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 413 Hüküm no: 677 Orijinal metin no: [66b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Avanis’in kürk bedelinden alacağı olduğu iddiasıyla Kürkçü Haçador aleyhine açtığı davada yüz guruşa sulh olduğu Kürkçü Avanis v. Serkiz nâm zimmî Galata Bâb Mahkemesi’nde meclis-i şer‘de Kürkçü Haçador v. Simon nâm zimmî tarafından husûs-ı âtîde vekîl olduğu diğer Haçador v. Ohan ve Andon v. Karabet nâm zimmîler şehâdetleriyle sâbit olan Artin v. Bedros nâm zimmî muvâcehesinde müvekkil-i mersûm Haçador zimmî zimmetinde bundan akdem yedimden ve mâlımdan iştirâ ve kabz eylediği beynimizde ma‘lûmü’l-aded kedi kürkü semeninden dört yüz yirmi guruşdan bâkī yüz elli guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-vesâtet-i muslihîn müvekkil-i mersûm Haçador zimmî ile yüz guruşa ba‘de’s-sulh ve’l-kabûl bedel-i sulh-ı merkūmdan mâ‘adâ elli iki buçuk guruşa müte‘allika da‘vâdan müvekkil-i mersûm Haçador zimmînin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm yüz guruş müvekkil-i mersûmun zimmetinde kalmağla taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı merkūm yüz guruşun müdde‘î-i mersûm Avanis zimmîye edâsıyla müvekkil-i mersûme izâfetle vekîl-i mersûm Artin zimmî ilzâm olunduğu bi’[l]-iltimâs huzûr-ı âlîlerine i‘lâm olundu. Fî 5 Ra sene 1222.