Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 413 Hüküm no: 678 Orijinal metin no: [66b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ali’nin yaptığı bina ile evinin mahremiyetini ihlal ettiği iddiasıyla kız kardeşi Rukiye aleyhine açtığı davada davalının gerekli tedbirleri almaya söz verdiği Galata’ya muzâfe kasaba-i Kasımpaşa’da Cami‘-i kebîr Mahallesi’nde sâkine mu‘arrefetü’z-zât Emine bt. Ali nâm hatun mahrûse-i mezbûrede mahfil-i kazâda li-ebeveyn kız karındaşı olup kezâlik mu‘arrefetü’z-zât Rukiye bt. el-mezbûr Ali muvâcehesinde nezâreti dâ‘îlerine meşrûta olan evkāfdan olup ashâb-ı hayrâtdan merhûm Abdulkādir Çavuş Vakfı musakkafâtından mahalle-i merkūmede vâki‘ ma‘lûmü’l-hudûd mutasarrıfe olduğu on yedi zirâ‘ arsa üzerine kız karındaşım mezbûre Rukiye Hatun bundan akdem binâ ve inşâ eylediği menzilinden ihdâs eylediği bir aded penceresinden benim makarr-ı nisvân olan mahallime nezâreti ve zarar-ı beyyini olmağla nezâreti men‘ u def‘ olunmak matlûbumdur deyü da‘vâya tasaddî eylemişidim el-hâletü hâzihî beynimize muslihîn tavassut edip beynimiz ıslâh olunup kız karındaşım mezbûre Rukiye Hatun zikrolunan pencereyi rızâsıyla sedd ü bende ve mutasarrıfe olduğu arsasına dahi binâ etmemek üzere ta‘ahhüd eyledi deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 7 Rebî‘ülevvel sene [1]222.