Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 414 Hüküm no: 679 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aranohi bt. Bağdasar kiracısı olduğu odayı tahliye edip mutasarrıfesi ve annesi Takohi’ye teslim etmesine karar verildiği Galata hâricinde Santa Marka Mahallesi’nde mütemekkine mu‘arrefetü’-şahs Takohi bt. Hürmüz Nasrâniye Galata Bâb Mahkemesi’nde meclis-i şer‘-i münîrde sadriye kebîre kızı kezâlik mu‘arrefetü’-şahs Aranohi bt. Bağdasar Nasrâniye muvâcehesinde kızım mersûme Aranohi Nasrâniye mahalle-i merkūmede vâki‘ mutasarrıfe olduğum bir bâb menzilin bir odasının beher şehr on guruş kirâ ile müstecirim olup lâkin oda-i mezkûrenin bana lüzûmu olmağla târih-i i‘lâm şehri gāyetine izâfetle fesh-i îcâr etmemle gāyet-i şehr-i mezkûrda oda-i mezkûreyi tahliye ve bana teslîme kızım mersûme Aranohi Nasrâniye’ye tenbîh olunmak matlûbumdur deyü da‘vâ eyledikde ol dahi ber-vech-i muharrer ikrâr u i‘tirâf etmeğin mûcebince gāyet-i şehr-i mezkûrda oda-i mezkûreyi tahliye ve müdde‘iye-i mersûme Aranohi [Takohi] Nasrâniye’ye teslîme mersûme Aranohi Nasrâniye’ye tenbîh olunduğu bi’l-iltimâs [huzûr-ı âlîlerine i‘lâm olundu.] Fî 11 Ra sene [1]222.