Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 415 Hüküm no: 682 Orijinal metin no: [67a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana bt. Serkiz’in kendisine hakaret ettiği iddiasıyla Şerbetçi Kirkor aleyhine açtığı tazir davasında iddiasını ispat edemediği Galata hâricinde Hüseyin Ağa Mahallesi’nde mütemekkine mu‘arrefetü’ş-şahs Saltana bt. Serkiz nâm Nasrâniye Galata Bâb Mahkemesi’nde meclis-i şer‘de Şerbetçi Kirkor v. Gapril nâm zimmî muvâcehesinde mersûm Kirkor zimmî târih-i i‘lâmdan bir gün mukaddem mahalle-i mezkûrede mütemekkine olduğum menzilim kapısı önünde sûkda bana bi-gayr-ı hakkın “kahpe oruspu” deyü bi’l-muvâcehe şetm etmekle mûcib-i şer‘îsini taleb ederim deyü ba‘de’d-da‘vâ ve’l-inkâr müdde‘iye-i mersûme Saltana Nasrâniye ber-vech-i muharrer müdde‘âsına ikāmet-i beyyine edemeyip bi’t-taleb mersûm Kirkor zimmî ba‘de’t-tahlîfü’ş-şer‘î mûcebince müdde‘iye-i mersûme Saltana Nasrâniye da‘vâ-yı mezkûresiyle mersûm Kirkor zimmîye bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 10 Ra sene 1222.