Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 416 Hüküm no: 686 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Dimitri v. Aleksi’nin emanetten Despino bt. Lazari’den ikrarı üzere yedi yüz guruş alacağı olduğu Galata hâricinde Hüseyin Ağa Mahallesi’nde mütemekkin Tütüncü Dimitri v. Aleksi nâm zimmî Galata Bâb Mahkemesi’nde meclis-i şer‘-i münîrde mahalle-i mezbûrede mütemekkine olup vech-i şer‘-î üzere mu‘arrefe Despino bt. Lazari nâm Nasrâniye muvâcehesinde ben bundan akdem Nasrâniye-i mersûmenin mahalle-i mezbûrede kâin mutasarrıfe olduğu menzilinde müstecir ve Nasrâniye-i mersûme ile bi’l-ma‘iyye mütemekkinler iken Nasrâniye-i mersûme yedine mâlımdan îdâ‘ ve teslîm eylediğim yedi yüz elli altı guruşu Nasrâniye-i mersûme bana vermeyip kendi umûruna harc u sarfla istihlâk etmekle meblağ-ı merkūmu Nasrâniye-i mersûmeden tazmîn taleb ederim deyü ba‘de’d-da‘vâ ve’l-istintak ol dahi cevâbında müdde‘î-i mersûm Dimitri zimmî yedinden ve mâlından bî-tarîkı’l-emâne ancak yedi yüz guruşu ahz u kabz ve kendi umûruna harc ve sarfla istihlâk edip meblağ-ı merkūm müdde‘î-i mersûma hâlâ zimmetinde deyni olduğu tâyi‘aten ve kat‘iyyeten ikrâr u i‘tirâf ziyâde elli altı guruşu inkâr etmeğin mûcebince müdde‘î-i mersûm Dimitri zimmî ziyâde müdde‘âsına ikāmet-i beyyineye ba‘de’l-havâle Nasrâniye-i mersûmenin mertebe-i ikrârı olan meblağ-ı merkūm yedi yüz guruşu müdde‘î-i mersûm Dimitri zimmîye bi-tarîkı’z-damân edâsıyla mersûme Despino Nasraniye’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 10 Ra sene 1222.