Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 417 Hüküm no: 687 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino bt. Lazari’nin Kostantin’e sattığı eşyaların bedelini buna aracı olan Tütüncü Dimitri v. Aleksi’den talep etmesinin meşru olmadığı Galata hâricinde Hüseyin Ağa Mahallesi’nde mütemekkine ve şahsı vech-i şer‘î üzere mu‘arrefe Despino bt. Lazari nâm Nasrâniye Galata Bâb Mahkemesi’nde meclis-i şer‘-i münîrde Tütüncü Dimitri v. Aleksi nâm zimmî muvâcehesinde ben târih-i i‘lâmdan yirmi bir ay mukaddem gāib ani’l-beled Kostantin nâm zimmîye ver deyü mersûm Dimitri zimmî yedine def‘ u teslîm eylediğim mecmû‘u bin beş yüz guruş kıymetli üç boğça derûnunda elbise-i mütenevi‘a-i ma‘lûmemi mersûm Dimitri zimmî yedimden ahz ve emr-i mezkûrum üzere gāib-i mersûma def‘ u teslîm eyledikden sonra mersûm Kostantin zimmî firâr ve gaybet-i munkatı‘a ile gāib olmağın eşyâ-ı mezkûremi gāib-i mersûma mücerred mersûm Dimitri yediyle teslîm eylediğime binâen gāib-i mersûmu bulup bana teslîme yâhud eşyâ-i mezkûrenin kıymet-i mezkûresini bana mâlından tazmîne mersûm Dimitri zimmîye cebr ve tenbîh olunmak matlûbumdur deyü tasaddî eylediği da‘vası takrîr-i meşrûhu üzere meşrû‘a ve iltifâta şâyân olmayıp mersûm Dimitri zimmîye şer‘an suâl dahi teveccüh etmediği bi’[l]-iltimâs huzûr-ı âlîlerine i‘lâm olundu. Fî 10 R[a] sene 1222.