Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 421 Hüküm no: 697 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin kiracısı olduğu dükkanı tahliye ederek mutasarrıflarına teslim etmesine karar verildiği Galata hâricinde Kalafatçıbaşı Yunus Ağa Mahallesi’nde çörekçi fırını [ile] varilci dükkânı beyninde kâin bir kıt‘a manav dükkânının ale’l-iştirâk mutasarrıfları olup dükkân-ı merkūm derûnunda mevcûd gedik ta‘bîr olunan âlât-ı lâzıme-i ma‘lûmenin bi’l-iştirâk mâlikleri Anton ve Oseb ve Petrak ve Teraza ve Tolonye nâm sıgārın anaları ve vasîleri Sima bt Aznador nâm Nasrâniye’nin karındaşı oğlu ve tarafından ber-vech-i câ’î vekîl-i müseccel-i şer‘îsi Andon v. Serope nâm zimmî Galata Bâb Mahkemesi’nde meclis-i şer‘-i münîrde Bostanî Mustafa Beşe b. el-Hâc Mehmed nâm kimesne mahzarında mezbûr Mustafa Beşe dükkân-ı merkūmda beher şehr yirmi beş guruş kirâ ile müstecir olup târih-i i‘lâma gelince iktizâ eden ücretini vasiyye-i mersûmeye mezbûr Mustafa Beşe def‘ u teslîm ol dahi ahz u kabz etmişidi lâkin dükkân-ı merkūmun sıgār-ı mersûmûna lüzûmu olmağla ben bi’l-vekâle fesh-i îcâr eylediğimde ol dahi dükkân-ı merkūmu târih-i i‘lâm şehrînin on beşinci günü tahliye ve sıgār-ı mersûmûn için vasiyy-i mersûmeye teslîme ta‘ahhüd-i tâm eyledi deyü sâdır olan takrîrîni mezbûr Mustafa Beşe bi-tamâmihî tasdîk eylediği bi’[l]-iltimâs huzûr-ı âlîlerine i‘lâm olundu. Fî 4 Ra sene [1]222.