Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 422 Hüküm no: 698 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Cafer’in alacağı olduğu iddiasıyla Ahmed Ağa aleyhine açtığı davada yirmi beş guruşa sulh olduğu Mustafa b. Ca‘fer nâm kimesne Galata Bâb Mahkemesi’nde meclis-i şer‘de Ahmed Ağa b. Mustafa nâm kimesne muvâcehesinde ben ücret ile hizmet eder makūlesinden olup mezbûr Ahmed Ağa’nın talebiyle ücret kavlinsiz yedi ay kendüye hizmetimin ecr-i misilden yirmi beş guruş mezbûr Ahmed Ağa yedinden ba‘de’l-ahz mâ‘adâ ecr-i mislim ile yedimden gasben ahz eylediği elli guruş [kıymetli] Trablus-kârı bir kuşağı mezbûr Ahmed Ağa’dan taleb ederim [deyü] tasaddî eylediğim da‘vâmdan bâ-tavassut-ı muslihîn mezbûr Ahmed Ağa ile yirmi beş guruş bedel-i makbûza ba‘de’s-sulh ve’l-kabûl müddet-i mezkûrede eylediğim hizmetimin mâ‘adâ ecr-i misline ve zikrolunan kuşağa ve kıymetine müte‘allika da‘vâdan ben mezbûr Ahmed Ağa’nın zimmetini ibrâ ve iskāt ol dahi bana medfû‘u olan bedel-i sulh-ı merkūm yirmi beş guruşun istirdâdına müte‘allika da‘vâdan benim zimmetimi ibrâ ve iskāt ve herbirimiz ber-vech-i muharrer âharın ibrâsını kabûl-birle kat‘-ı münâza‘a eyledik deyü ikrâr ve tasdîkleri huzûr-ı âlîlerine i‘lâm olundu. Fî 24 Ra sene [1]222.