Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 423 Hüküm no: 700 Orijinal metin no: [68b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Seyyid Feyzullah Çelebi’ye tasarrufunda olan menzili gayrımüslimlere kiraya vermemesi için tembihte bulunulduğu Mahrûse-i Galata hâricinde Kâtib Mustafa Çelebi Mahallesi imâmı İbrahim Efendi ve civârında kâin Karabaş Mahallesi imâmı Hâfız Mehmed Efendi ve ahâlîsinden Cizyedâr Mustafa Ağa ve Teberdâr Mehmed Tahir Ağa ve Kahveci İsmail Beşe ve Osman Alemdâr ve Abdi Ağa ve Kundakçı Hüseyin Beşe ve Yorgâncı Salih Ağa ve Berber İbrahim Beşe ve Bostanî Ali ve Tarakçı el-Hâc Abdulkādir ve Bostanî Hüseyin ve Bostanî İbrahim ve Kasab el-Hâc Mustafa ve Bevvâb Bostanî Mustafa ve Lüleci Mehmed Emin ve Bostanî Veliyüddin ve Subaşı Mehmed Emin ve Ases Mustafa ve Kömürcü Abdullah ve Kahveci Mustafa Beşe ve Bostanî Halil ve Bostanî Hasan ve sâirleri mahrûse-i mezbûrede mahfil-i kazâda sâhib-i arzuhâl kasab ustalarından es-Seyyid Feyzullah Çelebi b. Abdurrahman muvâcehesinde mezbûr es-Seyyid Feyzullah Çelebi mârru’z--zikr Kâtib Mustafa Çelebi Mahallesi’nde vâki‘ karîbü’l-ahd[d]e tefevvüz edip bi’l-icâreteyn mutasarrıf olduğu menzilimi bu esnâda bâ-re’y-i mütevellî Nasârâ tâifesine gālî bedel ile ferağ ve derûnunda tâife-i müşrikîn iskân murâd etmekle suâl olunup kadîmden Müslîm sâkin olan menzili hilâf-ı şer‘-i nebevî müşrikîne ferağ ve iskân dâ‘iyesinden men‘ olunmak matlûbumuzdur deyü da‘vâ eylediklerinde ol dahi cevâbında menzil-i mezkûr kadîmden beri Müslim sâkin olan menâzilden olduğunu ikrâr lâkin ben kasab ustası olduğum ecilden celeb tâifesinden ma‘lûmü’l-esâmî zimmîlere deynim olmağla mukābelesinde menzil-i merkūmu bâ-re’y-i mütevellî ferağ murâd ederim deyü ifâde ve iş‘âr etmekle bu misillü mâ-takaddemden beri Müslim sâkin olduğu menâzilden olup nûr-ı tevhîd-i hazret-i Rabbi’l-mecîd ile müzeyyen olan menzilin celb-i nef‘ zımnında tâife-i müşrikîne ferağ ve iskânı meşrû‘a olmadığından mâ‘adâ tevârîh-i muhtelife ile müverrah hutût-ı hümâyûn-ı mehâbet-makrûn mantûklarınca memnû‘ olmağla ber-muktezâ-yı şer‘ ve ber-mantûk-ı hutût-ı hümâyûn menzil-i mezkûru mutasarrıf mezbûr es-Seyyid Feyzullah Çelebi âhara ferağ murâd etdiği sûretde kemâ-fi’s-sâbık muvahhidîne fâriğ olup ba‘de’l-yevm müşrikîne ferağ ile iskân etmemek üzere mezbûr es-Seyyid Feyzullah Çelebi’ye tenbîh olunduğu mübâşirleri Receb Çavuş kulları yediyle huzûr-ı âlîlerine i‘lâm olundu. Fî 17 min-şehri Rebî‘ülevvel sene [1]222.