Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 424 Hüküm no: 701 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un tasarrufundaki vakıf arsasına müdahale ettiği iddiasıyla kız kardeşi Rukiye Hatun aleyhine açtığı davada haksız olduğunun anlaşıldığı Sâdır olan fermân-ı âlîlerine imtisâlen Galata Bâb Mahkemesi’nden me’zûnen mürsel Kâtib Hâfız Mustafa Tevfik Efendi dâ‘îleri hâssa mi‘mârı hulefâsından el-Hâc Ömer ve Mustafa halîfeler ile mahrûse-i mezbûreye muzâfe kasaba-i Kasımpaşa’da Câmi‘-i kebîr Mahallesi’nde vâki‘ nezâreti dâ‘îlerine meşrûta merhûm Abdulkādir Çavuş Vakfı müstegallâtından zikri âtî münâza‘un-fih olan vakıf menzil arsasına varıp huzûr-ı Müslimînde akd-i meclis-i şer‘-i âlî eyledikde arsa-yı mezbûrenin bi’l-icâreteyn mutasarrıfesi sâhibe-i arzuhâl mu‘arrefetü’z-zât Emine bt. Ali nâm hatun arsa-yı merkūme mütevellîsi Mustafa Ağa hâzır olduğu hâlde meclis-i ma‘kūd-ı mezkûrda arsa-yı merkūmeye muttasıl bir bâb menzilin mutasarrıfesi li-ebeveyn kız karındaşı derûn-ı arzuhâlde mezkûretü’l-ism kezâlik mu‘arrefetü’z-zât Rukiye bt. el-mezbûr Ali muvâcehesinde vakf-ı merkūm müstegallâtından bi’l-icâreteyn tasarrufumda olan menzil arsasından mi‘mârân-ı mezbûrânın mesâhalarıyla terbî‘an on yedi zirâ‘ işbu mu‘âyene olunan arsayı karındaşım mezbûre Rukiye Hatun bu esnâda fuzûlî ahz ve mutasarrıfe olduğu menziline zamm ü ilhâk ve üzerine ebniye ihdâs etmekle ebniye-i merkūmeyi hedm-birle arsa-yı merkūmeden keff-i yed ve bana teslîme kız karındaşım mezbûre Rukiye Hatun’a tenbîh olunmak matlûbumdur deyü da‘vâ eyledikde ol dahi cevâbında işbu yedimde olan diğer hâmiş-i arzuhâlde mastûr bâlâsı musahhah bir kıt‘a i‘lâm-ı şer‘î nâtıka olduğu üzere arsa-yı merkūmeyi bi-a‘yânihâ benden da‘vâ ve ben dahi müdde‘âsını inkâr-birle beynimizde ba‘de vukū‘i’l-münâza‘a ve bâ-vesâtet-i muslihîn kız karındaşım müdde‘iye-i mezbûre zikrolunan on yedi zirâ‘ arsayı otuz guruş bedel-i makbûza bâ-re’y-i mütevellî bana ferağ-ı kat‘î ile ferağ ve tefvîz eyledikde ben dahi tefevvüz ve kabûl ve mütevellî-i hâzır-ı mezbûr dahi tasarrufumu re’y edip bu vechile on yedi zirâ‘ arsa-yı merkūme havza-i tasarrufum oldukdan sonra kız karındaşım mezbûre Emine Hatun sâlifü’z-zikr on yedi zirâ‘ arsaya ben dahi medfû‘um olan bedel-i merkūm otuz guruşa müte‘allika âmme-i da‘vâdan herbirimiz âharın zimmetini ibrâ ve herbirimiz ber-vech-i muharrer âharın ibrâsını kabûl-birle kat‘-ı münâza‘a etmişdik deyü mazmûnu min-külli’l-vücûh takrîr-i meşrûhuna mutâbık bir kıt‘a i‘lâm-ı mezkûru ibrâzıyla deyü ve eylediği def‘ini lede’t-tezkiye adl ve makbûlü’ş-şehâde idükleri ihbâr olunan Ali Beşe b. Süleyman ve Mustafa Ağa b. Ali ve Mehmed Ağa b. Ahmed nâm kimesneler şehâdetleriyle muvâcehesinde vech-i şer‘-î üzere isbât etmeğin mûcebince müdde‘iye-i mezbûre Emine Hatun da‘vâ-yı mezkûresiyle kız karındaşı mezbûre Rukiye Hatun’a bî-vech-i şer‘î mu‘ârazadan men‘ eylediğini [edildiğini] kâtib mezbûr mahallinde tahrîr ve bi-ecmâ‘ihim meclis-i şer‘a gelip tarafeyn muvâcehesinde ba‘de’l-[i]nhâ ve’[t]-tenfîz mübâşirleri Mustafa Çavuş kulları yediyle bi’[l]-iltimâs huzûr-ı âlîlerine i‘lâm olundu. Fî 19 Ra sene 1222.