Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 425 Hüküm no: 704 Orijinal metin no: [69a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İbrahim’e olan borcunu ödeyip rehin eşyasını alması için Maryem bt. Karabet’e tembihte bulunulduğu Medîne-i Üsküdar’da Selami Mahallesi’nde sâkine mu‘arrefetü’z-zât Fâtıma bt. İbrahim nâm hatun Galata Bâb Mahkemesi’nde meclis-i şer‘de mu‘arrefetü’ş-şahs Maryem bt. Karabet nâm Nasrâniye muvâcehesinde mersûme Maryem Nasrâniye zimmetinde cihet-i karzdan hakkım olan yirmi sekiz guruş mukābelesinde işbu meclis-i şer‘de mu‘âyene olunan bir mâî çuka şalvar ve bir çit yorgan yüzü ve üç billûr kâse ve bir sagīr sim kabzalı bıçak ve bir tâbesini yedime irhân ve teslîm etmekle zikrolunan eşyâları yedimden ahz-birle meblağ-ı mezkûru bana edâya mersûme Maryem Nasrâniye’ye tenbîh olunmak matlûbumdur deyü da‘vâ eyledikde ol dahi cevâbında ber-vech-i muharrer ikrâr u i‘tirâf etmeğin mûcebince zikrolunan eşyâları müdde‘iye-i [69b] mezbûre Fâtıma Hatun yedinden ahz-birle meblağ-ı mezkûr yirmi sekiz guruşu müdde‘iye-i mezbûre Fâtıma Hatun’a edâya mersûme Maryem Nasrâniye’ye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 26 Ra sene 1222.