Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 426 Hüküm no: 706 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoşafçı, şerbetçi ve kebapçı esnafından bazı kimselerin nizamlarına aykırı olarak ayaklı tezgâhta şerbet satmasından dolayı Bozacı Ahmed Beşe’den şikayetçi oldukları Mahrûse-i Galata ve tevâbi‘inde vâki‘ hoşâbcı ve şerbetçi ve kebabçı ve çörekçi esnâfının kethüdâsı Ömer Ağa ve yiğitbaşısı İbrahim Alemdâr ve çavuşları İsmail ve müsinn [ü] ihtiyâr Müslim ustalarından İbrahim Usta ve diğer İbrahim Usta ve Hüseyin Usta ve Ya‘kub Usta ve Ali Usta ve Latif Usta ve Mehmed Usta ve âhar İbrahim Usta ve Mehmed Usta ile zimmî ustalarından İstavri ve Yorgi ve Serot ve Karabet ve Saru ve Nikola ve Angeli ve Kosti ve sâirleri mahrûse-i mezbûrede mahfil-i kazâda Ahmed Beşe muvâcehesinde herbiri takrîr-i kelâm ve ifâde-i merâm edip işbu yedimizde olan tuğralı iki kıt‘a fermân-ı âlî mantûkunca Galata ve tevâbi‘inde kâin altmış dört adede mahsûs dekâkînde mevcûd hoşâbcı ve şerbetçi esnâfı ustalarından olup dekâkîn-i merkūme ibâdullâha kâfi ve vâfî [olup] dükkân ihdâsıyla ve ba‘zı pîr-perver olmayan hâm-dest ecnebî makūlelerinin köşebaşlarına ayaklı şerbetçi destgâhı vaz‘ıyla esnâf-ı merkūmenin umûruna müdâhalesi memnû‘ olup mâ-takaddemden beri tekâlif-i örfiyeden üzerimize edâsı lâzım gelen sürsât ve bedel-i lağım ve ihtisâbiyye ve tekâlif-i şâkka-i sâireyi kethüdâ ve ustalarımız ma‘rifetleriyle beynimizde tevzî‘ ve taksîm ve kabzına me’mûra teslîm edip nizâm-ı kadîmimiz vech-i meşrûh üzere cârî olagelmişken merkūm Bozacı Ahmed Beşe karîbü’l-ahdde Tophâne-i âmire’de kârhâne kapısı kurbünde sebîl ittisâlinde mugāyir-i emr-i âlî ve nizâm-ı mer‘î ayaklı şerbetçi destgâhı vaz‘-birle esnâf-ı merkūmenin ihtilâl-i nizâmını mûcib halat ve mugāyir-i emr-i âlî harekâta ictisâr etmekle bundan mukaddemce diğer i‘lâmıyla mezbûrun men‘ olunmasını istirhâm etmişdik el-hâletü hâzihî harekât-ı nâ-marziyyede ısrâr etmeğin mugāyir-i fermân-ı âlî hareketten men‘ olunmak matlûbumuzdur deyü mazmûn-i münîfi min-külli’l-vücûh takrîr-i meşrûhlarına mutâbık iki kıt‘a fermân-ı âlî ibrâzıyla da‘vâ eylediklerinde mezbûr Bozacı Ahmed Beşe dahi cevâbında husûs-ı merkūm ve mazmûn-ı emr-i âlîşânları bi-tamâmihâ ikrâr u i‘tirâf etmekle bu sûretde madde-i mezkûre umûr-ı nizâmîden olup esnâf-ı merkūmenin nizâmlarını ihtilâlden [vikāye] ve takayyüd-i emr-i âlîşânı mûcib hâlâtdan olmağla mezbûr Bozacı Ahmed Beşe’nin ber-vech-i meşrûh müdâhalesi men‘ u def‘ olunmak bâbında esnâf-ı merkūmenin istid‘âlarına müsâ‘ade re’y-i rezîn-i âsafânelerine menût mevâddan idüğü bi’[l]-iltimâs huzûr-ı âlîlerine i‘lâm olundu. Fî-selhi Ra sene 1222.