Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 428 Hüküm no: 709 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed Reis’in satışı iptal olunan sefîne bedelinden Kalafatçı Ahmed Beşe’ye verdiği yüz kırk dört guruşunun kendisine iâdesine karar verildiği Sefîne reislerinden es-Seyyid Ahmed Reis b. Musa nâm kimesne Galata Bâb Mahkemesi’nde meclis-i şer‘de Kalafatçı Ahmed Beşe b. Mehmed nâm kimesne muvâcehesinde ben bundan akdem Ahmed Beşe yedinden çekdirme ta‘bîr olunur bir kıt‘a sefîneyi sekiz yüz guruşa nesî’eten iştirâ ve kabz etmişdim semen-i mezkûr sekiz yüz guruşu nâtık yedine bir kıt‘a temessük verdikden sonra meblağ-ı mezkûrun yüz kırk dört guruşunu yedine teslîm edip ba‘dehû beş ay mürûrunda mezbûr Ahmed Beşe zikrolunan sefîneyi iznimsiz ahz ve âhara bey‘ ile istihlâk etmekle ben dahi bey‘-i mezkûru mücîz olup mezbûr Ahmed Beşe temessük-ı merkūmu bana teslîm edip ben dahi kendüye medfû‘um olan yüz kırk dört guruşu mezbûr Ahmed Beşe’den istirdâd ederim deyü da‘vâ eyledikde ol dahi ber-vech-i muharrer ikrâr u i‘tirâf etmeğin mûcebince meblağ-ı mezkûr yüz kırk dört guruşu müdde‘î-i mezbûr es-Seyyid Ahmed Reis’e edâsıyla mezbûr Ahmed Beşe ilzâm olunduğu bi’[l]-iltimâs huzûr-ı âlîlerine i‘lâm olundu. Fî 25 Ra sene 1222.