Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 428 Hüküm no: 710 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Seyyid Hacı Halil Efendi’nin câbisi ve mütevellî kaymakamı olduğu Yahya Kethüda Camii Vakfı’ndan alacağı olduğu iddiasıyla vârislerinin vakfın yeni mütevellîsi aleyhine açtıkları davalarında haksız oldukları Mahrûse-i Galata’ya muzâfe kasaba-i Kasımpaşa’da sâkin iken bundan akdem vefât eden es-Seyyid el-Hâc Halil Efendi b. İbrahim’in verâseti zevce-i menkûha-i metrûkeleri Zeliha bt. Lütfullah ve Ümmügülsüm bt. el-Hâc Halil ile sulbî kebîr oğlu İsmail ve sulbiye kebîre kızları Şerife Cemile ve Şerife Reşide ve Şerife Ganime ve sulbiye sagīre kızları Şerife Rukiye ve Şerife Fâtıma’ya ba‘de’l-inhisâr sagīrân-ı mezbûrân Şerife Rukiye ve Şerife Fâtıma’nın vâlideleri ve kıbel-i şer‘den mansûbe vasîleri zâtı mu‘arrefe mezbûre Zeliha ve mezbûr İsmail ile kezâlik zâtları mu‘arrefe mezbûrât Ümmügülsüm ve Şerife Reşide ve Şerefe Ganime asâleten ve vesâyeten ve mezbûre Şerife Cemile tarafından husûs-ı âtîde vekîl olduğu zâtını ârifân es-Seyyid İbrahim b. es-Seyyid Hasan ve Mehmed Beşe b. Mehmed şehâdetleriyle sâbit olan Mustafa Efendi b. el-Hâc Ahmed vekâleten mahrûse-i mezbûrede meclis-i şer‘-i münîrde kasaba-i mezbûrede Yahya Kethüdâ Cami‘-i şerîfi mütevelliyesi mu‘arrefetü’z-zât Fâtıma Molla bt. el-Hâc Mehmed nâm hatun muvâcehesinde mûrisimiz müteveffâ-i mezbûr es-Seyyid el-Hâc Halil Efendi vakf-ı mezbûra bundan akdem câbî ve kāimmakām-ı mütevelliye iken hâl-i hayâtında kāimmakāmlığı hengâmında rü’yet eylediği işbu bir kıt‘a muhâsebe defteri zeylinde tahrîr olunduğu vech üzere müstecirîn zimmetlerinde müctemi‘a bakāya-yı icârât bin dokuz yüz kırk yedi guruşdur deyü şerh verilmiş iken ba‘de vefâtihi vakf-ı mezbûra es-Seyyid Hâfız Halil Rüşdü Efendi nâmında bir kimesne kāimmakām olup mezbûrun talebiyle icârât zuhûr edip lâkin muhâsebe tarihinden mukaddem mûrisimiz müteveffâ-i mezbûr es-Seyyid el-Hâc Halil Efendi mâlından umûr-ı vakf-ı mezkûra sarf eylediği bin yüz guruşa mahsûben kendi kabz etmek için ol mikdâr bakāya-yı icârâtı defter-i muhâsebeye idhâl ettirmeyip kable’l-ahz fevt olmağla bakāya-yı mezkûre bize mevrûs olmağın meblağ-ı merkūmu bi’l-verâse ve bi’l-vesâye taleb ederim deyü da‘vâ eylediklerinde mütevelliye-i mezbûre Fâtıma Molla dahi cevâbında bin iki yüz on sekiz senesi Şa‘bânı’nın on üçüncü günü müdde‘ûn-ı mezbûrûnun mûrisleri kāimmakām-ı mezbûr es-Seyyid el-Hâc Halil Efendi’nin hayâtında sâkin olduğu menzilinde huzûr-ı Müslimînde muhâsebemizi rü’yet eylediğimiz hînde mezbûr es-Seyyid el-Hâc Halil Efendi ibtidâ-ı kāimmakāmlığımdan târih-i muhâsebeye gelince umûr-ı vakfa mâlımdan harc ve sarf eylediğim meblağı zuhûr eden galle-i vakıfdan bi-tamâmihâ ahz u kabz ve istîfâ-yı hak edip gerek taraf-ı vakıfda ve gerek bakāya-yı icârâtda kat‘â alâka ve medhalim yokdur bakāya-yı icârât olmak üzere müstecirîn zimmetlerinde cüz’î ve küllî zuhûr eden mebâliğ vakf-ı mezkûrun mâlı olup benim alâkam ve medhalim olmamakla husûs-ı mezkûra müte‘allika âmme-i da‘vâdan taraf-ı vakf-ı mezbûr ile benim zimmetimi ibrâ ve iskāt edip benden bi’t-tevliye ibrâsını kabûl etmişidim deyü ba‘de’d-def‘ ve’l-inkâr dâfi‘a-i mütevelliye-i mezbûre Fâtıma Molla ber-vech-i meşrûh def‘-i mezkûrunu lede’t-tezkiye adl ve makbûlü’ş-şehâde idükleri ihbâr olunan es-Seyyid Ahmed Efendi b. el-Hâc Halil ve Mehmed Said Efendi b. Molla Abdullah b. Mustafa nâm kimesneler şehâdetleriyle müdde‘ûn-ı mezbûrûn muvâcehelerinde vech-i vecih-i şer‘î üzerinde isbât etmeğin mûcebince müdde‘ûn-ı mezbûrûn da‘vâ-yı mezkûreleriyle bî-vech-i şer‘î mu‘ârazadan men‘ olundukları bi’[l]-iltimâs huzûr-ı âlîlerine i‘lâm olundu. Fî 15 Safer sene 1222.