Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 430 Hüküm no: 711 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Mehmed Memiş b. İbrahim’in havaleden Panayot v. Paskal’dan iki yüz guruş alacağı olduğu Kasab Kalyoncu Mehmed Memiş b. İbrahim Galata Bâb Mahkemesi’nde meclis-i şer‘i münîrde Panayot v. Paskal zimmî muvâcehesinde mersûm Panayot zimmî zimmetinde havâle-i sahîha-i şer‘iyeden iki yüz guruş alacak hakkım olup hattâ ol kadar guruş bana deyni olduğunu ikrâr ve memhûr temessük yedime i‘tâ etmekle suâl olunup meblağ-ı merkūmu bana edâya tenbîh olunmak murâdımdır deyü da‘vâ ettikde ol dahi cevâbında ber-vech-i muharrer temessük i‘tâsını ikrâr lâkin deynim olmayıp kâziben ikrâr etmişdim dedikde müdde‘î-i mezbûr da‘vâsında mübtil ve mersûm Panayot ikrârında kâzib olduğuna bi’t-taleb müdde‘î-i mezbûr Mehmed Memiş’e nehc-i şer‘î üzere [yemîn] teklîf olunmağın mûcebince meblağ-ı merkūm iki yüz guruşu müdde‘î-i mezbûra edâya mersûm Panayot zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 28 Ra sene 1222.